თეთრი კაბა, ფატა, მენდელსონის მარში, შამპანურის შხეფები – ამაზე ბევრი ქალი ოცნებობს, მაგრამ ყველა მამაკაცი როდია მზად ოფიციალური ქორწინებისთვის. როგორ მოიქცეთ? თქვენი რჩეული დაარწმუნეთ, რომ დაქორწინების შემდეგ სიხარული არათუ მოაკლდება, პირიქით, ბევრ სასიამოვნო მომენტს იგემებს.
ჰობი ძალაში რჩება
მამაკაცს სიტყვა გადაუკარით, რომ მეგობრებთან შეხვედრას არ დაუშლით, მის ჰობის, თევზაობა იქნება თუ ნადირობა, არაფერი ემუქრება, პირიქით, თუ წინააღმდეგი არ იქნება, კომპანიონობას სიამოვნებით გაუწევთ.
სიხარულსა და მწუხარებაში
ყოველთვის გვერდით იყავით, როდესაც მამაკაცი თავს ცუდად გრძნობს. ყურადღებით მოუსმინეთ, პატივისცემა გამოამჟღავნეთ. მისი ძლიერი მხარეები შეამჩნიეთ, როგორც ოთახის ყვავილზე, მასზე ისე იზრუნეთ. პარტნიორი ამას დააფასებს და თქვენნაირი ერთგული მეგობრის დაკარგვას არ მოისურვებს.
მამაკაცის გულისკენ გზა კუჭზე გადის
თქვენი კულინარიული შესაძლებლობები და მაგიდის ლამაზად გაწყობის ცოდნა აჩვენეთ. ამისთვის საჭირო არ არის, რთული კერძების რეცეპტები აითვისოთ და "ხოხობი ბოჰემურად" მოამზადოთ. მისი მარტოხელა ტრაპეზის ფონზე ყველაზე ბანალური კერძიც კი გემრიელი მოეჩვენება. და, რა თქმა უნდა, დაფიქრდება: "თუ დავქორწინდები, ყოველდღიურად გემრიელად ვისაუზმებ, ვისადილებ და ვივახშმებ, თანაც არა – მარტო, არამედ საყვარელ ქალთან ერთად".
ფინანსურად არ დაზარალდება
თუ გრძნობთ, რომ მამაკაცს დაქორწინების შემდეგ ფულის ხარჯვა აღელვებს, სტატისტიკა მოიშველიეთ: ქორწინებაში მყოფი ადამიანები პრაქტიკულად 2–ჯერ უფრო უზრუნველყოფილი არიან, ვიდრე უცოლოები. და, რა თქმა უნდა, ოჯახურ ბიუჯეტში თქვენს წილს შეიტანთ.
მის დედასთან მეგობრობა
ამ ქალის მიმართ პატივისცემა და თავაზიანობა გამოიჩინეთ. მიახვედრეთ, რომ მისი ადგილის დაკავებას არ აპირებთ, არამედ გსურთ, მისი მეგობარი გახდეთ. მიანიშნეთ, რომ თქვენისთანა სარძლოსთან სიბერეში მარტოობა არ ემუქრება. ამგვარად, მამაკაცს ქორწინებისკენ მისთვის ავტორიტეტული პიროვნება უბიძგებს.
კეთილი სიტყვები ფისოსაც სიამოვნებს
ნუ მოგერიდებათ, პარტნიორს თქვენი სიყვარული აჩვენოთ, მასზე ზრუნვა გამოავლინეთ. ალერსზე, სინაზესა და კეთილ სიტყვებზე გულუხვი იყავით. ყველაფერი კარგი შეამჩნიეთ, რასაც მამაკაცი თქვენთვის აკეთებს და ამისთვის აუცილებლად მადლობა გადაუხადეთ. თქვენი რჩეული თანდათან ყველაფერს ანგარიშს გაუწევს – ადამიანი კარგს მალე ეჩვევა.
უკანასკნელი ზომები
* თუ ყველა ჩამოთვლილი მეთოდის შემდეგ მამაკაცი გადაწყვეტილებას მაინც არ იღებს, წინადადება თავად შესთავაზეთ. იმოქმედეთ გეგმის მიხედვით:
* შესაფერისი მომენტი შეარჩიეთ. პარტნიორი სრულად მოდუნებული უნდა იყოს და არსად ეჩქარებოდეს.
* საუბარი ნეიტრალურ ტერიტორიაზე მოწმეების გარეშე უნდა შედგეს. მაგალითად, როდესაც პარკში სეირნობთ ან მყუდრო კაფეში მაგიდასთან სხედხართ.
* ქარაგმებით საუბარს ნუ დაიწყებთ. მის მიმართ თქვენს გრძნობაზე უბრალოდ და გულწრფელად ისაუბრეთ. მაშინ დიდი შანსია, მალე თქვენს თითზე ნანატრი საქორწინო ბეჭედი იხილოთ.
ჟურნალი სარკე
წყარო: sana.ge
დაეხმარეთ მამაკაცს, ხელი და გული შემოგთავაზოთ
⏱️ 1 წთ.
👁️ 1 562
100%