გოდების კედელი
მკვლევარები ფიქრობენ, რომ ეს სახელი არაბებმა მოიგონეს, როცა ნახეს როგორ მისტიროდნენ ებრაელები თავიანთი ხალხის ბედს. ადგილი მართლაც წმინდაა ებრაელთათვის - აქ ერთი ღმერთის სადიდებლად აგებული ტაძარი იდგა. პირველი, სოლომონის მიერ აგებული, ბაბილონის მმართველმა ნაბუქოდონოსორმა დაანგრია. ტაძარი აღადგინეს, მაგრამ რომაელებმა დაანგრიეს. ყველაფერი რაც გადარჩა, 488 მეტრი სიგრძის დასავლეთი კედელია. გოდების კედელს ეძახიან ღია 57 მეტრიან მონაკვეთს. ებრაელები კედელთან სალოცავად მიდიოდნენ. ვისაც მისვლა არ შეეძლო თხოვნის შემცველ წერილებს ატანდა. ასე ჩაეყარა საფუძველი კედელში ბარათების ჩადებას. დღეისათვის აქ ბარათს ყველა ტოვებს, რწმენისდა მიუხედავად. წელიწადში ორჯერ წერილებს იღებენ და იქვე ახლოს ფლავენ - ზეთისხილის (ელეონის) მთაზე.
სორეკის გამოქვაბული
ისრაელის ყველაზე დიდი სტალაქტიტური გამოქვაბული შემთხვევით აღმოაჩინეს 1968 წელს - ხაარ-ტუვის მთაზე, 385 მეტრ სიმაღლეზე, ხრეშის მოპოვების დროს. კარიერში მორიგი აფეთქების დროს მცირე ნახვრეტი გაიხსნა, რომელ ადგილასაც შემდეგში გამოქვაბულში შესასვლელი გააკეთეს. 4800 კვადრატულ მეტრ ფართობზე განლაგებულია სხვადასხვა სახის სტალაქტიტები და სტალაგმიტები, რომელთა ასაკი მეცნიერთა შეფასებით 5 მილიონ წელს აღწევს. 1975 წლიდან აქ ექსკურსიები დაუშვეს. სტალაქტიტების და სტალაგმიტების წარმოქმნა დღემდე გრძელდება, ამიტომ დამთვალიერებლებს მათზე ხელით შეხება ეკრძალებათ.
იუდეის უდაბნო
ისრაელის ყველაზე პატარა უდაბნოს ფართობი 22 კვადრატული კილომეტრია, დანარჩენი ნაწილი პალესტინაში და იორდანიაში მდებარეობს. მისი სახელი იუდას - იაკობის 12-დან ერთ-ერთი შვილის მემკვიდრეებთანაა დაკავშირებული, რომელთაგან წმინდა წერილის მიხედვით წარმოიშვა ისრაელის ხალხი. ეს ადგილი ამბოხებულების და მწირების თავშესაფარს წარმოადგენდა. აქ ემალებოდა ებრაელთა მეფე დავითი მეფე საულს. აქ გამოქვაბულში 30 წელი ცხოვრობდა იოანე ნათლიმცემელი, რომელმაც შემდეგში იესო მონათლა. დღეს უდაბნოში ბედუინები და ებრაელი მოსახლეები ცხოვრობენ.
იაფას ნავსადგური
ძველი ისრაელის მთავარი ნავსადგური ამავე დროს მსოფლიოს ერთ-ერთი უძველესი ქალაქია, სადაც ცხოვრება არასდროს შეწყვეტილა. ლეგენდის მიხედვით მას სახელი იაფეტის _ ბიბლიური ნოეს შვილის მიხედვით უწოდეს. ითვლება, რომ სწორედ აქ ააგო ნოემ თავისი კიდობანი. ეს ადგილი ცნობილია ძველ ბერძნული მითებიდანაც - იოპიაში (იაფა) პერსევსმა დაამარცხა ზღვის ურჩხული და გაანთავისუფლა ანდრომედე, რომელიც ნაპირთან კლდეზე იყო მიჯაჭვული. იაფა პირველად ჯერ კიდევ ჩვენს წელთ აღრიცხვამდე XV საუკუნის ეგვიპტურ ქრონიკებშია ნახსენები. იგი ფარაონ თუთმოს III-ისმიერ დაპყრობილ ქალაქებს შორისაა მოხსენიებული. დღეს ძველი ქალაქი ტელ-ავივთან ერთად ერთ დიდ მეგაპოლისს ქმნის, ხოლო ნავსადგური კი მთავარ ადგილობრივ ღირშესანიშნავობად რჩება.
აღდგომის ტაძარი
ტაძარი აგებულია იმ ადგილას, სადაც გადმოცემით ქრისტე ჯვარს აცვეს, დაკრძალეს და სადაც აღსდგა. დღეისათვის ტაძარი ექვს ქრისტიანულ კონფესიას შორისაა გაყოფილი: მართლმადიდებლურ, კათოლიკურ, სომხურ, კოპტურ, სირიულ და ეთიოპურს შორის. კონფესიებს შორის კონფლიქტის თავიდან ასაცილებლად XII საუკუნის ბოლოდან ტაძრის გასაღები არაბი-მუსლიმის ოჯახში ინახება, ხოლო კარების გაღების და დაკეტვის უფლება, მეორე მაჰმადიანურ დინასტიას ეკუთვნის (გასაღები მთელი ამ დროის განმავლობაში მამიდან შვილს გადაეცემა). ტაძარში ქრისტეს საფლავის წინ, დაახლოებით IV საუკუნიდან აქ მონიშნეს მიწის ჭიპი - მსოფლიოს ქრისტიანული სამყაროს ცენტრი, ადამიანთა მოდგმის გადარჩენის ადგილი. იმისათვის, რომ მისი ზუსტი ადგიმდებარეობა აღნიშნონ, აქ დღესაც დევს დაბალი მარმარილოს თასი ბურთით, რომელზეც ჯვარია გამოსახული. თასი საკმაოდ მსუბუქია და ამიტომ ჯაჭვითაა დაბმული, რათა ტურისტებმა ანდა მლოცველებმა ადგილი არ მოუნაცვლონ, ანდა არ წაიღონ.
ბაჰაის ბაღები
ერთ-ერთი ყველაზე ახალგაზრდა რელიგიის ბაჰაის ცენტრი მდებარეობს ჰაიფაში და ცნობილია თავისი ტერასული ბაღებით, რომლებიც კარმელის მთის ფერდობზეა გაშენებული. ტერასების სიგრძე დაახლოებით კილომეტრია და მათ მთის წვერზე მივყავართ, სადაც დაკრძალულია ბაბა - იტანელი წინასწარმეტყველი, რომელმაც ბაჰაიზმის ფუძემდებლის ბაჰაულას მოსვლა იწინასწარმეტყველა. ბაჰაის რწმენას XIX საუკუნის შუა წლებში, სპარსეთში ჩაეყარა საფუძველი. ბაჰაულამ განაცხადა, რომ იგი ერთიანი ღმერთის წარგზავნილია, ხოლო აბრაამი, მოსე, ზოროასტრი, კრიშნა, ბუდა, ქრისტე, მუჰამედი და ბაბა - მისი წინამორბედები არიან. 1868 წელს ბაჰაულა ჰაიფაში გადაასახლეს. მისი მიმდევრებიც სპარსეთიდან და ეგვიპტიდან აქეთ გამოემართნენ. მალე ქალაქი რელიგიის ცენტრი გახდა. ბაღების გაშენებაზე 250 მილიონი დოლარი დაიხარჯა. ფული ბაჰაიზმის მიმდევრებმა გაიღეს.
მკვდარი ზღვა
გაუდინარი მლაშე ტბა ისრაელს, იორდანიასა და პალესტინას შორის - დედამიწის ზედაპირის ყველაზე დაბალი წერტილია. აქ წყლის დონე 427 მეტრით უფრო დაბალია მსოფლიო ოკეანის დონესთან შედარებით. მკვდარი ზღვა მსოფლიოს ერთ-ერთი ყველაზე უფრო მლაშე წყალსატევია. აქ ლიტრ წყალში 340 გრამი მარილია გახსნილი, 10-ჯერ უფრო მეტი ვიდრე ოკეანის წყალში. მკვდარ ზღვაში ცურვა ძნელია, თუმცა ტურისტები აქ საცურაოდ კი არ დადიან, არამედ კანის დაავადებების სამკურნალოდ. აქაურ წყალში და თიხაში 50 მილიარდი ტონა მინერალია, რომელიც 21 სახეობას განეკუთვნება. აქედა 12 სახეობა სხვაგან არსად არ გვხვდება.
alioni.info