გეგას და თინას სიყვარულის ისტორია სატელეფონო საუბრებით დაიწყო. მრავალრიცხოვანი თაყვანისმცემლებით გარემოცული თინათინ ფეტვიაშვილის პაემანზე გამოსაყვანად, გეგა კობახიძეს თავისი სამსახიობო ოსტატობა დაეხმარა - თინას თავი ინვალიდის სავარძელს მიჯაჭვულ ხეიბრად წარუდგინა, თან დაამატა - შეხვედრის ადგილას აუცილებლად მივალ და გულნატკენი დავრჩები, თუ არ მოხვალო. ამის მშვიდად მოსმენა მგრძნობიარე გოგონას ძალებს აღემატებოდა. თინა პაემანზე მივიდა და იქ თბილისელი გოგოებისთვის კერპად ქცეული გეგა კობახიძე დახვდა.
ამ დროს გეგა 22 წლის იყო და თეატრალურ ინსტიტუტში სწავლობდა. 19 წლის თინა კი სამხატვრო აკადემიის სტუდენტი იყო.
ცნობილი კინორეჟისორის მიხეილ კობახიძისა და მსახიობი ნათელა მაჭავარიანი ოჯახში დაბადებული ყმაწვილი სამსახიობო ხელოვნებას ბავშვობიდან ეზიარა.
მისი კინოდებიუტი 1967 წელს შედგა - ნანა მჭედლიძის ფილმში „ვიღაცას ავტობუსზე აგვიანდება". შემდეგ გეგა „ლაზარეს თავგადასავალში" გადაიღეს, სადაც მთავარი გმირის როლი შეასრულა. მერე იყო ნიკოლოზ სანიშვილის „ჩიტის რძე", ლანა ღოღობერიძის - „აურზაური სალხინეთში", „ოთხი შარვალი და ერთი ჩითის კაბა" და „კროსვორდის ამოხსნის მოყვარულთათვის". სანამ ცხოვრების უკანასკნელ, ტრაგიკულ როლს შეასრულებდა, გეგა კობახიძეს თენგიზ აბულაძის „მონანიებაში" იღებდნენ.
1983 წლის 18 ნოემბერს მეხის გავარდნასავით გაისმა, რომ შვიდმა ახალგაზრდამ საბჭოთა წყობას პროტესტი გამოუცხადა და ქვეყნიდან გაქცევა თვითმფრინავის გატაცების გზით სცადა. მათ შორის იყვნენ გეგა და თინა. თვითმფინავის გამტაცებელთა აყვანის სპეცოპერაცია უმსხვერპლოდ არ დასრულებულა, რამაც ახალგაზრდების მდგომარეობა უფრო დაამძიმა.
საბჭოთა სასამართლომ გეგა კობახიძეს და მის ხუთ მეგობარს სასჯელის უმაღლესი ზომა - დახვრეტა მიუსაჯა. თინათინ ფეტვიაშვილს კი 15 წლით თავისუფლების აღკვეთა შეუფარდეს. სამი თვის ფეხმძიმე გოგონას საპყრობილეში აბორტი გაუკეთეს. თინას ციხეში ყოფნა თითქმის ექვს წელი მოუწია. ხელისუფლებაში ზვიად გამსახურდიას მოსვლის შემდეგ თინამ საპატიმრო დატოვა და საკუთარ თავში იპოვა ძალა, რომ ახალი ცხოვრება დაეწყო. თინა ფეტვიაშვილი მსახიობ სოსო ლაღიძის რძალია, თუმცა გეგას დედასთან კონტაქტი დღემდე არ გაუწყვეტია. ნათელა მაჭავარიანი იხსენებს, რომ მისი შვილი თინას გაცნობის შემდეგ უფრო მხიარული გახდა.
ნათელა მაჭავარიანი:
- ეს ძალიან სუფთა და ნამდვილი სიყვარული იყო. თინას გაცნობის შემდეგ გეგა უფრო მხიარული გახდა. საერთოდ, გეგა ძალიან სუფთა კაცი იყო, მიუხედავად იმისა, რომ გოგონების ყურადღება არ აკლდა, თავში არასოდეს „ავარდნია". წესიერი და იუმორით სავსე ბიჭი იყო. როგორც თინიკო ჰყვება, მის გაცნობაშიც რაღაც იუმორი ჩადო. როგორ გაიცნო, როგორ შეაცოდა თავი, რომ ინვალიდის ეტლში ზის და სიარული არ შეუძლია. ასეთი სიყვარულის კაცი იყო და თინასაც ძალიან უყვარდა. რომ არ ჰყვარებოდა, იქ არ წაყვებოდა, იმ ორომტრიალში.
- გეგას თაყვანისმცემლები როგორ შეხვდნენ მისი დაქორწინების ამბავს?
- ალბათ ვიღაცას გული დასწყდა, ვიღაცას - გაუხარდა. ვერ გეტყვით... სანამ თინას გაიცნობდა, ერთი ასეთი ისტორია ჰქონდა. ყველამ იცოდა, რომ გეგას ტკბილეული ძალიან უყვარდა და ერთი გოგონა კვირაში ორჯერ ან სამჯერ სახლში ნამცხვრებს უგზავნიდა. ამ გოგონას არც სახელი მახსოვს და არც გვარი, მაგრამ მახსოვს, რომ მოჰქონდა ნამცხვრები და სადარბაზოში, კართან ყუთით ტოვებდა. გეგას ასეთი ყურადღება ძალიან აწუხებდა და თავს უხერხულად გრძნობდა. მერე ტაქტიანად აუხსნა ამ გოგონას, რომ არ უყვარდა და მისგან გამოგზავნილ ტკბილეულს ვერ მიიღებდა.
- როგორი იყო პატარა გეგა?
- საკმაოდ ცელქი და მოძრავი. ბავშვობიდან უყვარდა წარმოდგენების დადგმა. თანატოლებთან ერთად დგამდა სპექტაკლებს, ერთ ოთახში ფარდას ჩამოკიდებდნენ და თამაშობდნენ. ქვიშხეთში რომ ვისვენებდით, იქ სულ რაღაცებს დგამდნენ. ერთხელ მახსოვს, ქვაბების თავსახურები გამოალაგეს სამზარეულოდან და ორკესტრი გააკეთეს. ბავშვობიდან საოცარი იუმორი ჰქონდა..
- თინასთან თუ გაქვთ ურთიერთობა?
- რა თქმა უნდა, მაქვს. ახლახან საკმაოდ მძიმე ოპერაციის გაკეთება მომიწია და ჯერ ისევ შეუძლოდ ვარ. ორი-სამი დღე არ გავა, რომ არ დამირეკოს და არ მომიკითხოს. საუბრის ბოლოს, მინდა დიდი მადლობა გადავუხადო საზოგადოებას, რომელსაც „თვითმფრინავის ბიჭები" არ ავიწყდება. თუ ჩემს მდგომარეობას შეიძლება ბედნიერება ეწოდოს, ბედნიერი ვარ იმით, რომ ქუჩაში ჩემს დანახვაზე გამვლელები ერთმანეთს ეჩურჩულებიან, რომ გეგას დედა ვარ. აი, ასეთი სიყვარული დამიტოვა..
გეგა კობახიძემ და თინა ფეტვიაშვილმა თვითმფრინავის გატაცებამდე ერთი დღით ადრე იქორწინეს...
funtime.ge