ერთი ძალიან სახალისო, ნამდვილი ამბავი.
დედაჩემს, ერთი მეგობარი ქალი ყავდა, რომელთანაც სამსახურის გარდა ახლო მეგობრობაც აკავშირებდა, ზუსტად ამ ქალის ისტორია მინდა გაგიზიაროთ…
ნორას გათხოვება მაინცდამაინც არასოდეს უნდოდა, მაგრამ ოცნება ჰქონდა ნიშნობის ბეჭედი (კალიცო) ეტარებინა, ამ ოცნების ასრულებისთვის კი, მოგეხსენაბათ გათხოვება იყო საჭირო და ნორიჩკამაც “გარისკა” … მაგრამ ქმარმა კალიცო არ აჩუქა.
გულნატკენი ნორა ( უფალო,მისი სული ამყოფოს ნათელში, იმედია არ მიწყენს. )…მალევე გაშორდა ქმარს და მეორედ გათხოვდა, მაგრამ, ჰოი საოცრებავ, ისტორია განმეორდა – მეორე ქმარმაც არ აჩუქა ბეჭედი, განაწყენებულმა ქმარს უსაყვედურა, კალიცოს გულისთვის ორჯერ გავთხოვდი და არცერთმა ქმარმა ბეჭედი არ მაღირსეთო.
მაშინ მეუღლემ შესთავაზა, მოდი სამსახურში ლატარეა ითამაშე და ფულს რომ აიღებ ბარემ ისეთი შეუკვეთე, შენ როგორიც გინდაო…
მთელი წელი ელოდა ეს ქალი თავის ფულს როდის აიღებდა და ეგრევე ოქრომჭედელთან გავარდა 10 გრამიანი ბაჯაღლოს კალიცოს შესაკვეთად…და აი დადგა დღე, როდესაც ნორიჩკამ თავისი ბეჭედი გამოიტანა და სახლისკენ გამოსწია, გახარებული და ბედნიერი სულ ხელზე იყურებოდა, მაგრამ საკუთარ სადარბაზოში შესულს ვიღაცა ტიპი დახვდა, დანა დაადო და ფული და ოქრო მოსთხოვა.
ნორას ფული არ ჰქონდა იმიტომ რომ ოქრომჭედელი გაისტუმრა, ხოლო ოქროდან მხოლოდ კალიცო ეკეთა, გამოიძრო ეს ბეჭედი, მიაწოდა და თან ისტერიული სიცილი აუტყდა, ქურდი გაშტერდა, შენ ხომ არ გაჟრიალებს, მე გქურდავ და შენ რა გაცინებსო…ჰოდა უთხრა ნორიჩკამ რაც აცინებდა, ამ ბეჭდის გამო ორჯერ გავთხოვდი და არცერთმა ქმარმა კალიცო არ მაღირსა, მერე მთელი წელი ლატარეას ვთამშობდი, ფული მოვაგროვე, ოქრომჭედელს შევუკვეთე, დღეს გამოვიტანე, პირველად მეკეთა ხელზე და ეხლა შენ მართმევ, ეტყობა არ მიწერია ამის ტარება და წაიღე, ალალი იყოსო…
კაცი გამოშტერდა, ამხელა ქალაქში ორი ასეთი უვარგისი კაცი სად ნახეო.
მოგიკვდეს შენ გრიშაო, ჩაიყო ჯიბეში ხელი, ამოიღო ბრილიანტის ბეჭდები იქიდან და ამოარჩიე რომელიც გინდაო, მოკლედ, ბევრი რომ არ გავაგრძელო, კარგი 2 ბრილიანტის ბეჭედი უფეშქაშა თავის კალიცოსთან ერთად და უთხრა… ერთი რაღაც მინდა გთხოვოო, ქურდი კაცი ვარ, გრიშა მქვია, დღეს აქა ვარ, ხვალე არ ვიცი სად ვიქნები, ჰოდა შენ როცა საშუალება მოგეცემა ხოლმე, ჩემი სადღეგრძელო ყოველთვის დალიეო…
არ არსებობდა სუფრა, ამ ქალს რომ ყოველთვის მისი სადღეგრძელო არ დაელია, ჩემს მესამე და ყველაზე ნაღდ ქმარს – გრიშას გაუმარჯოს სადაც არის, ღმერთო მფარველობა არ მოაკლოვო….არცერთმა ქმარმა კალიცო არ მაღირსა, იმან კალიცოც მომცა და ბრილიანტის ბეჭედიცო… გარეთ 80-იანი წლები იდგა… უფალო მაპატიე.
მამუკა მჭედლიშვილი
www.postalioni.com
ნორას გათხოვება მაინცდამაინც არასოდეს უნდოდა, მაგრამ ოცნება ჰქონდა – ნიშნობის ბეჭედი
⏱️ 1 წთ.
👁️ 21 778
100%