ზაფხული - სეზონი,როცა ადამიანებს განსაკუთრებულად სურთ ლამაზად და მიმზიდველად გამოიყურებოდნენ,თუმცა ამის მიღწევა ზოგჯერ არც ისე ადვილია.
ზაფხულის მოახლოებასთან ერთად, უმეტესობა ე.წ. მზის აბაზანებს ანუ გარუჯვას მიმართავს. თუმცა, ამ ერთი შეხედვით მარტივ პროცესს კანისთვის ზიანის მიყენებაც შეუძლია. თუ არ გსურთ მზის აბაზანებმა კანი დაგიზიანოთ, გარკვეული წესები უნდა დაიცვათ. ამ საკითხთან დაკავშირებით რჩევებს კლინიკა მედის დერმატო-კოსმეტოლოგი მაკა ქარდავა მოგვცემს:
- რა წესები უნდა დავიცვათ მზის აბაზანის მიღებისას?
- მზის აბაზანის მიღებისას, უპირველესად ზომიერების დაცვაა აუცილებელი. ამასთანავე, დიდი რაოდენობით სითხე უნდა მივიღოთ, შევზღუდოთ ალკოჰოლი და დიდი სიფრთხილით დავგეგმოთ გარეთ შესასრულებელი სამუშაოები, ასევე, აუცილებლად დროც.
ზოგადად, მზის სხივების ჭარბი მიღებით (ინსოლაციით) ხდება კანის უჯრედების დნმ-ის და კანის პიგმენტური უჯრედების გარკვეულწილად დაზიანება. ეს კი იწვევს კანის სიმშრალეს, გაღიზიანებადობას, სიწითლეს, ფართოვდება ფორები, იქმნება ალერგიული ფონი. მათ აღმოსაფხვრელად და გასანეიტრალებლად აუცილებელია კოსმეტოლოგიური პროფესიონალური მოვლა, რომელიც გულისხმობს ინექციურ და აპარატურულ მეთოდებს.
- რას გულისხმობთ აპარატურულ და ინექციურ მეთოდიკაში?
- ინექციურ პროცედურებში იგულისხმება კანის ღრმად დატენიანება, რომელიც ხორციელდება მიკროინექციებით. კანქვეშ ხდება სამკურნალო კოქტეილების შეყვანა,რომლის ძირითად კომპონენტებს წარმოადგენს ვიტამინები, მინერალები, ანტიოქსიდანტები და აუცილებლად ჰიალურონის მჟავა, რომლებიც იცავს და ღრმად ატენიანებს კანს. ეს ნივთიერებები წარმოადგენს ერთგვარ დამცავ მექანიზმებს კანისთვის. აპარატურული მეთოდი კი გულისხმობს კანის გარქოვანებული უჯრედების ატრამვულ მოცილებას რადიოსიხშირის ტალღებით, ასევე კანქვეშა შრეების სტიმულირებას, დამატენიანებელ სამკურნალო ნიღბებთან ერთად.
- მზისგან დამცავი კრემების საკმაოდ დიდი არჩევანია. რას გვირჩევთ, სად შევიძინოთ ისინი და არის თუ არა კანისთვის საზიანო იაფასიანი მალამოები.
- მზისგან დამცავი მალამო აუცილებლად სპეციალისტმა ინდივიდუალურად უნდა შეურჩიოს თითოეულ პაციენტს. მალამო უნდა იყოს მაღალი ფილტრაციით და არ უნდა შეიცავდეს კოსმეტოლოგიის შავ სიაში მოხვედრილ ნაერთებს, როგორიცაა: პარაბენი,მეთილპარაბენი. ან უნდა იყოს რაც შეიძლება ნატურალური ინგრედიენტების შემცველი.
- მშრალი და ცხიმიანი კანისთვის სხვადასხვა მალამოა საჭირო?
- რა თქმა უნდა, არსებობს განსხვავება კანის მოვლის საშუალებებში. აბსოლუტურად განსხვავებული მალამო გამოიყენება მშრალი კანის მოვლის დროს და სულ სხვა ცხიმიანი და კომბინირებული კანის ტიპისთვის.
- ამბობენ, რომ დამატენიანებელი კრემის წასმის შემდეგ, მზეზე ყოფნა არ შეიძლება,რადგან ლაქებს აჩენს. ამაზე რას გვეტყვით?
- ეს მხოლოდ იმ შემთხვევაში ხდება,თუ გარუჯვის დროს დეკორატიულ კოსმეტიკას ვიყენებთ. ამიტომ მზეზე ყოფნის დროს არ უნდა გამოვიყენოთ დეკორატიული კოსმეტიკა. დამატენიანებელი საშუალებები კი არანაირ საფრთხეს არ უქმნის ადამიანის კანს, თუ სწორადაა შერჩული.
- რა იგულისხმება დეკორატიულ კოსმეტიკაში?
- ეს შეიძლება იყოს კანის დამფარავი საშუალებები,მაგალითად როგორიცაა ტონალური.
- გოგონების უმრავლესობა გარუჯვას გაზიანი სასმლის ან ლუდის გამოყენებით ცდილობს. ეს კანისთვის საზიანო ხომ არ არის?
- ლუდით და გაზიანი სასმელებით კანს ფერი არ მოემატება, ამ დროს უფრო დიდი საშიშროებაა იმის, რომ კანის ზედაპირზე გაჩნდეს პიგმენტური ლაქები, ამიტომ მათ წასმას არავის ვურჩევ.
- როგორ უნდა ვუმკურნალოთ დამწვრობის შედეგად კანზე გაჩენილ ბუშტუკებს, იმ შემთხვევაში,თუ სპეციალისტთან ვიზიტის საშუალება არ გვაქვს?
- დიახ, კანზე ბუშტების გაჩენა ეს არის დამწვრობის ერთ-ერთი ნიშანი და ამ შემთხვევაში თვითმკურნალობას არავითარ შემთხვევაში არ უნდა მივმართოთ. ასეთ შემთხვევაში აუცილებლად კვალიფიციურ სპეციალისტთან უნდა გავიაროთ კონსულტაცია და ამის შემდეგ დაინიშნება საჭირო მედიკამენტი.
- დაბინძურებული წყალი ზოგჯერ კანზე ალერგიასა და გამონაყარს იწვევს.ამ დროს როგორ უნდა მოვიქცეთ?
- ამ შემთხვევაშიც, სპეციალისტი სწორად შეგვირჩევს ანტიალერგიულ საშუალებებს, პრობლემის და დაზიანების ხარისხის მიხედვით.
- რა რჩევებს მისცემდით სოლარიუმის მომხმარებლებს. არის თუ არა ხელოვნური სხივები კანისთვის ან ზოგადად ჯანმრთელობისთვის საზიანო?
- ზომიერი ინსოლაცია (გარუჯვა) არანაირად არ ვნებს კანს. თუმცა სოლარიუმში რუჯის მიღება უფრო დიდი სიფრთხილითაა საჭირო და ზომიერების დაცვით რა თქმა უნდა.
- რამდენი პროცენტით ზრდის სოლარიუმით ან მზისგან მიღებული დამწვრობა კანის სიმსივნის რისკს?
- რა თქმა უნდა, ერთ-ერთ მაპროვოცირებელ ფაქტორად და კანის დაბერების მექანიზმებში პირველ ადგილზე დგას მზის ჭარბი ინსოლაცია, ეს იქნება ბუნებრივი ულტრაიისფერი სხივებით მიღებული რუჯი თუ არაბუნებრივად მიღებული. მაგრამ, კიდევ ერთხელ ავღნიშნავ, რომ ზომიერად მიღებული რუჯი კანისთვის არანაირ საფრთხეს არ წარმოადგენს.
ლელა მდივანი
info9.ge
რჩევები მზის,ზღვისა და გარუჯვის მოყვარულებს
⏱️ 1 წთ.
👁️ 1 983
100%