მშვენიერი სქესის წარმომადგენლებმა კარგად იციან, გარეგნობაში რამდენად ძლიერი იარაღია სუფთა, ლამაზი კანი. კოსმეტოლოგიურ მომსახურებას თბილისში ბევრი სილამაზის ცენტრი ან ქსელი გვთავაზობს. მსუბუქი წმენდის ერთი პროცედურისთვის თანხა საშუალოდ 60 ლარიდან უნდა იანგარიშოთ, ღრმა წმენდა შედარებით ძვირია. კოსმეტოლოგიურ პროცედურას სხვადასხვა სალონში განსხვავებული ფასი აქვს; ხშირად გვთავაზობენ ფასდაკლებების ვაუჩერებსაც. სააბაზანოში ყველა ქალს აქვს ნიღბები და კრემები. შედარებით ხარისხიანი ნიღბების შეძენა 20 ლარიდან შეგიძლიათ. აფთიაქებში სახის გამწმენდი ლოსიონის ფასები 5 ლარიდან იწყება. სკრაბების ფასიც განსხვავებულია, თუმცა, სკრაბის დამზადება სახლის პირობებშიც შეგვიძლია და განსაკუთრებული პოპულარობით მჭადის ფქვილი სარგებლობს. მჭადის ფქვილისგან მიღებული ნატურალური სკრაბისგან გაცილებით უკეთეს შედეგს ნახავთ, თუ ცოტა მარილს და სოდას ჩაამატებთ.
ყველამ კარგად ვიცით, მაკიაჟის ერთ-ერთი დიდი დატვირთვა ე.წ. ტონალურ კრემზე მოდის. შედარებით ხარისხიანი ტონალური კრემისთვის თქვენი ფინანსები 30 ლარიდან უნდა იანგარიშოთ. რასაკვირველია, არის უფრო იაფი „ტონაკებიც“, მაგრამ მათ ხშირად გამოყენებას კოსმეტოლოგები არ გვირჩევენ. ხარისხიანი კრემ-პუდრას შეძენა თუ გსურთ თანხა 35-40 ლარიდან გაითვალისწინეთ.
ყველა ქალისთვის მთავარი საზრუნავი არასასურველი თმის მოშორებაა. ვიდრე ესთეტიკის ცენტრები გაჩნდებოდა, ქალბატონები ჭარბთმიანობას შინაური მეთოდებით ებრძოდნენ, დღეს უკვე არის იმის საშუალება, თმა კომფორტულ გარემოში მოიცილო; ლაზერული ეპილაცია მთელ მსოფლიოში და მათ შორის საქართველოში დიდი პოპულარობით სარგებლობს.
ქალბატონები დამეთანხმებიან, ყველა ცენტრის ადმინისტრაციას ამ პროცედურაზე თავისი ფასი აქვს. ალექსანდრიტის ლაზერით თმის მოცილების პროცედურის ფასები დაახლოებით შემდეგი ლარიდან უნდა იანგარიშოთ: ზედა ტუჩი 20 ლარიდან, ბაკები - 50, სახე მთლიანად საწყისი ფასი 90 ლარიდან, ხელი იდაყვამდე 40 ლარიდან, მთლიანი ხელი 60-70 ლარიდან. დიოდური ლაზერის ფასები საშუალოდ ასე გამოიყურება: ზედა ტუჩი 20 ლარი, ბაკები 40 ლარიდან, ბიკინი 60 ლარი, ფეხები 100-120 ლარიდან, მუცლის თეთრი ხაზი 30-35 ლარიდან, ზედა კიდურები 60-70 ლარიდან, ზედა კიდურები იდაყვამდე 30 ლარიდან. სალონებში ცვილით დეპილაციასაც შემოგვთავაზებენ - ზედა ტუჩის პროცედურა საშუალოდ 10 ლარიდან უნდა იანგარიშოთ, ხელების 20-დან. ყველა დაწესებულებას თავისი ფიქსირებული ფასი აქვს - ამასთან, სადღესასწაულო დღეებში ადმინისტრაცია განახევრებულ ფასებს და სხვადასხვა პროცედურაზე 30-იან, 50-იან ან 70%-იან ფასდაკლებასაც კი გვთავაზობს.
რასაკვირველია, არსებობს უფრო იაფი საშუალება - დეპილაციის კრემი, რომელიც არასასურველ თმას დაახლოებით ერთი კვირით მოგაშორებთ. დეპილაციის კრემის შეძენა ყველგან შეგიძლიათ და საშუალოდ მისი ღირებულება 8 ლარიდან უნდა განსაზღვროთ. ლამაზი ღიმილი ერთ-ერთი მნიშვნელოვანი დეტალია. კბილების გაწმენდისთვის ბიუჯეტი საშუალოდ 50 ლარიდან უნდა განსაზღვროთ.
რაც შეეხება თმის მოვლას. მაღაზიებსა და აფთიაქებში ისეთი პოპულარული შამპუნების შეძენა 15 ლარამდე დაგიჯდებათ; იმავე ფირმის თმის ბალზამებიც საშუალოდ 15 ლარამდე ღირს. რასაკვირველია, პროდუქცია მრავალფეროვანია და კონსულტანტები შედარებით ძვირადღირებულ შამპუნებსა და თმის მოვლის საშუალებებსაც შემოგთავაზებენ - ამ შემთხვევაში თანხა 25 ლარიდან უნდა გაითვალისწინოთ.
გადავიდეთ ყველა ქალის საყვარელ პროცედურაზე - სალონში ვიზიტი და თმის დავარცხნა. ყველა უბანშია სალონი გახსნილი და შესაბამისად, პროცედურის ღირებულებაც განსხვავებულია. თუმცა, საშუალო ფასების განსაზღვრა ამ შემთხვევაშიც შეგვიძლია. თმის შეჭრის პროცედურა 6 ლარიდან იწყება, ხოლო დავარცხნა 8 ლარიდან. ვისაც წელამდე სიგრძის თმა აქვს, დამეთანხმება, დავარცხნის შემდეგ, შესაძლოა ზოგიერთ სალონში დაწესებულ ფიქსირებულ ფასს რამდენიმე ლარი დაემატოს. რაც შეეხება ისეთ განსაკუთრებულ დღეებს, როცა ან ქორწილში მიბრძანდებით ან წვეულებაზე მიგიპატიჟეს, ნამდვილად ღირს თქვენს ფანტაზიას გასაქანი მისცეთ და თავი მოდური ან ორიგინალური ვარცხნილობით მოიწონოთ - სადღესასწაულო ვარცხნილობის ღირებულება 20 ლარიდან იწყება. წარბის კორექცია საშუალოდ 5-10 ლარი ღირს.
ნუ დავივიწყებთ სხეულსაც; ვინც ზედმეტ წონას ებრძვის, ან უბრალოდ სურს, ფიგურა გაიმკვრივოს, ამისთვის საცურაო აუზის, ან სპორტდარბაზის აბონიმენტი სჭირდება. თბილისში რამდენიმე საცურაო აუზი გვემსახურება. საცურაო აუზის თვიური აბონიმენტის ღირებულება, რომელიც 12 ვიზიტს მოიცავს, საშუალოდ 120 ლარიდან იწყება. აუზის პრესტიჟულობის მიხედვით ფასებიც საკმაოდ იზრდება. შეგიძლიათ, ერთჯერადი, ერთსაათიანი ვიზიტით ისიამოვნოთ - საშუალოდ, ერთჯერადი ვიზიტის ღირებულება 15-20 ლარიდან იწყება. ლამაზი სხეულის გარანტიას იძლევა ფიტნესი, შესაბამისად, საჭიროა სპორტდარბაზს ვეწვიოთ, სადაც სხვადასხვა კომპლექსური ვარჯიშისთვის განკუთვნილი ინვენტარია.
უნდა აღინიშნოს, რომ გარეუბნებში ერთთვიანი აბონიმენტი შედარებით იაფია და ერთთვიანი აბონიმენტის შეძენა საშუალოდ 50-60 ლარადაა შესაძლებელი. რაც შეეხება ცნობილ კომპლექსებს, ამ დაწესებულებებში აბონიმენტის ღირებულება 100 ლარიდან იწყება და პირობებისა და უახლესი სპორტული ინვენტარის გათვალისწინებით, ფასებიც თავისთავად იმატებს. ზოგიერთ სპორტდარბაზში განსხვავებულია შეზღუდული დროისა და ულიმიტო აბონიმენტის ფასიც. არსებობს სრულიად უფასო ალტენრატივა - ქუჩაში სირბილი, თუმცა ყველა უბანში ნამდვილად არაა იმის ფუფუნება, ეზოში სუფთა ჰაერზე ირბინო; თან თუ გავითვალისწინებთ ტროტუარზე გაჩერებულ ავტომობილებს, ასეთ პირობებში სირბილის კი არა გაჩერებამდე კომფორტულად გადაადგილების საშუალებაც კი მინიმუმამდეა დაყვანილი.
ძვირფასო ქალბატონებო, დამეთანხმებით, რომ ყოველთვის როცა მაღაზიის ვიტრინიდან სასურველი კრემი თუ სხვა რომელიმე კოსმეტიკური ნაწარმი „გვიღიმის“, იმის მიხედვით ვარჩევთ, რის საშუალებასაც საფულეში არსებული თანხა იძლევა. ასევე, არსებობს სარეალაქსაციო ან ანტიცელულიტური მასაჟი და ა.შ. მიუხედავად იმისა, რომ ჩამოთვლილი პროცედურებით ყველა ვერ ახერხებს ხშირად სარგებლობას, მაინც სასიამოვნოა, რომ მცირე ბიუჯეტის ფარგლებშიც კი ქუჩებში ამდენი ლამაზი და მოვლილი ქალი გვეგებება. ვფიქრობ, სახეზე ღიმილი ჩვენი ბედნიერებისა და სილამაზის საწინდარია და მას ვერანაირი ძვირად ღირებული კოსმეტიკა ჩაანაცვლებს.
info9.ge