ლამაზი ხელები ახალგაზრდობას გაგიხანგრძლივებთ



როგორც წესი, ხელები არასოდეს იტყუებიან, ყოველთვის გვაწვდიან ინფორმაციას იმის შესახებ, თუ რა სახის სამუშაოს ასრულებენ. კანისა და ფრჩხილების სწორი და სისტემატური მოვლა ხელებს სილამაზეს დიდი ხნით უნარჩუნებს.

ყოველდღიური, ჩვეული რეჟიმი, სახლის დალაგება, პირადი ჰიგიენა, სამსახურში ინტენსიური მუშაობა - ყველაფერი ეს ხელებისთვის ძალიან დიდი დატვირთვაა. ყოველივე ამის გარდა, ისინი სისტემატურად განიცდიან გარემო ფაქტორების ზეგავლენას, მზის სხივების ზემოქმედებას. საერთოდ, ხელის კანი უფრო ნაზი და ნაკლებად ცხიმიანია ნებისმიერ სხვა უბანთან შედარებით. ამიტომ ის უფრო მალე ბერდება და რეგულარულ და ინტენსიურ მოვლას საჭიროებს.

ნაზი კანი


ხშირად ქალები სახისა და ტანის პილინგს ვიკეთებთ, დაღლილი ხელების სასიამოვნო პროცედურით განებივრება კი გვავიწყდება. დღესდღეობით კანის გაწმენდისთვის უამრავი საშუალება არსებობს, ერთ-ერთი მათგანის მომზადება თვითონაც შეგიძლიათ სახლის პირობებში. აიღეთ 1 სუფრის კოვზი მარილი (სუფრის ან ზღვის) და აურიეთ 1 სუფრის კოვზ მცენარეულ ზეთში. მასაში დაასველეთ ბამბის ტამპონი და ნაზად შეიზილეთ ხელებში.

მარილი მოაცილებს კანს გარქოვანებულ ნაწილებს, ხოლო მცენარეული ზეთი არა მარტო ხელს შეუშლის კანის გაღიზიანებას, არამედ საკმაოდ ეფექტურად დაარბილებს კიდეც.

ბ და ც ჯგუფის ვიტამინები კანს ელასტიკურობას უნარჩუნებს. ისინი საკმაო რაოდენობითაა სიბერის საწინააღმდეგო საშუალებებში. ვიტამინები აჩქარებს კანის უჯრედების განახლების პროცესს, ამცირებს გაღიზიანებას, სიწითლეს და ნაოჭების წარმოშობას. ასევე მკვეთრად აუფერულებს ასაკობრივ ლაქებს.
დამწვრობისგან დაცვა

თუ ხელებზე კანი ძალიან შრება, წითლდება, გამონაყრით იფარება, იქერცლება, იგრძნობა არასასიამოვნო ქავილი, ამ შემთხვევაში ერთ-ერთი ყველაზე უფრო საიმედო და გამოცდილი საშუალება არაჟანია. წაისვით მისი თხელი ფენა დაზიანებულ უბნებზე და წვისა და ქავილის შეგრძნება უცებ მოიხსნება. ასევე საუკეთესო საშუალებაა ახალი მარწყვი. გასრისეთ, ფაფისებური მასა მოათავსეთ დოლბანდზე და წაისვით დაზიანებულ უბნებზე. შვებას მაშინვე იგრძნობთ.

ფრჩხილების მკურნალობა

ფრჩხილები ხშირად ზიანდება - წყლის, სარეცხი საშუალებების, დიდი დატვირთვისა და არასაკმარისი მოვლის შედეგად. თუ არ არის საკმარისი ტენი ან ცხიმი, ფრჩხილები აშრევებას იწყებს და იოლად იმტვრევა. ამიტომ საოჯახო საქმეების დაწყების წინ ფრჩხილებში მცენარეული ზეთი შეიზილეთ და ზემოდან ვაზელინით დაფარეთ. ჩაიცვით სპეციალური რეზინის ხელთათმანები. ხელთათმანების შერჩევისას აუცილებელია გაითვალისწინოთ სიგრძე - ისინი იდაყვამდე უნდა იყოს.

როგორ გავიმაგროთ ფრჩხილები

კვირაში ერთხელ ფრჩხილები დაიმუშავეთ სპეციალიზებული "გამაპრიალებელი" ბალიშით. ეს მნიშვნელოვნად ასტიმულირებს ფრჩხილების ფალანგებში სისხლის მიმოქცევას და ხელს უწყობს ფრჩხილის ჯანმრთელ ზრდას.

როგორ უნდა გავიქლიბოთ ფრჩხილები

ფრჩხილები უნდა გავიქლიბოთ კიდიდან ცენტრისკენ, მხოლოდ ერთი მიმართულებით, სხვა შემთხვევაში ფრჩხილები აშრევებას დაიწყებს. თუ ფრჩხილების დამოკლება გსურთ, იხმარეთ უფრო მსხვილი ქლიბი, ხოლო ფორმის მისაცემად სასურველია გამოიყენოთ შედარებით უფრო წვრილი და თხელი.

როგორ შევუნარჩუნოთ ფრჩხილს თეთრი ფერი

მიუხედავად სპეციალური საშუალებების გამოყენებისა, დროთა განმავლობაში ფრჩხილის ზედა ფენა იცვლის ფერს, მას მოყვითალო ელფერი გადაჰკრავს ხოლმე. გასათეთრებლად ფრჩხილები მოათავსეთ შუაზე გაჭრილ ლიმონში 10 წუთით და შემდეგ წყლით ჩამოიბანეთ. ხელების კანის გასასუფთავებლად ძალიან ეფექტურია შემდეგი რეცეპტი - ორი სუფრის კოვზ ოხრახუშს დაუმატეთ ერთი ჭიქა ადუღებული წყალი და ამ ნაყენით აბაზანა გაიკეთეთ.
ალბათ დარწმუნდით, როგორი არანორმალური დატვირთვა მოდის ხელებზე. ამიტომ აუცილებელია მათი მოვლა და გავარჯიშება. გთავაზობთ რამდენიმე რჩევას.

1. კვება და მკურნალობა - კვირაში ერთხელ მაინც შეიზილეთ ფრჩხილის ფალანგში და თითებზე ზეითუნის ზეთი. შედეგად ფრჩხილები მოქნილი გახდება და იოლად აღარ დაიმტვრევა.

2. როგორ მოვუაროთ გამომშრალ კანს - ხშირად იხმარეთ დამატენიანებელი კრემები. მათი მოქმედება გაძლიერდება, თუ თავიდან კარგად დაიბანთ ხელებს საპნით ან მიიღებთ ორთქლის აბაზანას.

3. ღამით დროდადრო ჭარბად წაისვით ხელებზე მკვებავი ან ჩვეულებრივი ცხიმიანი კრემები, შემდეგ მთელი ღამით გაიკეთეთ ბუნებრივი მასალისაგან შეკერილი ხელთათმანები.

4. მოიცილეთ ცხიმი - სანამ ფრჩხილებზე ლაქს წაისვამთ, მოაცილეთ მათ ცხიმი, ეს შეგიძლიათ განახორციელოთ ჩვეულებრივი საპნიანი წყლით ან ფრჩხილებისთვის სპეციალური ცხიმგაცლილი ხსნარით


წყარო: etanews.ge
































ტექსტის სანახავად გაიარეთ რეგისტრაცია.