თუ ეს-ეს არის, შხაპი მიიღეთ, სანამ საწოლს მიაშურებთ, 15 წუთი გრჩებათ. იცით თუ არა, რამდენის გაკეთება შეიძლება ამ პერიოდში? თუ გსურთ, ლამაზმა გაიღვიძოთ, მარტივი მანიპულაციების მთელი რიგი უნდა ჩაიტაროთ. ყველაფერ დანარჩენს თქვენთვის ბუნება გააკეთებს.
22:45 - სახე. გამწმენდი კრემი დაიდეთ და ცენტრიდან საფეთქლებისკენ მასაჟი გაიკეთეთ. თბილი წყლით ჩამოიბანეთ და რბილი პირსახოცით შეიმშრალეთ. შემდეგ ლოყებზე, შუბლსა და ყელზე დამატენიანებელი კრემი წაისვით.
22:50 - თვალები. ასაკის მატებასთან ერთად თვალების ირგვლივ წვრილი ნაოჭები ჩნდება. ნაზი კანის გასასწორებლად ანტიმჟანგავების შემცველი ქუთუთოების კრემი წაისვით.
22:52 - ტუჩები. მშრალი კანი სამმაგი მოქმედების ასაქერცლი კრემის დახმარებით მოიშორეთ და შემდეგ მკვებავი ბალზამი უხვად წაისვით. დილით თქვენი ტუჩები ყვავილის ფურცელივით ნაზი იქნება.
22:54 - სხეული. მსუბუქი ფართო მოძრაობთი სუფთა სხეულზე დამატენიანებელი ლოსიონი წაისვით.
22:56 - ფეხები და ხელები. ფეხისგულებში ბალახების ექსტრაქტზე დამზადებული დაღლილობის მოსახსნელი ფეხის კრემი შეიზილეთ და შემდეგ ბამბის წინდები ჩაიცვით, თბილ ფეხებზე კრემის დამარბილებელი ეფექტი გაძლიერდება. ხელებზე ხელის კრემი წაისვით და ორივე ხელი ნაზად მანამ დაისრისეთ, სანამ კრემი მთლიანად არ შეიწოვება.
22:58 - თმა. დაასვენეთ თმაც. ნატურალური ჯაგრისით ყველა მიმართულებით გულმოდგინედ დაივარცხნეთ. ამით სისხლის მიმოქცევას სტიმულს აძლევთ და კულულებიდან მტვერსა და თმის ლაქს მოიცილებთ. თუ ღამით თმა იწეწება, ატლასის ბალიშისპირი შეიძინეთ.
23.00 - ძილი. თუ შეშუპებისაკენ გაქვთ მიდრეკილება, რეკომენდებული არ არის, დაძინებამდე ერთი საათით ადრე რამე დაილოთ. თუ ეს პრობლემა არ გაწუხებთ, საწოლში ფინჯანი გვირილის ან პიტნის ჩაი დალიეთ. ძილისათვის საუკეთესო პოზიცია ზურგზე წოლაა. დილით სახე ''დაჭმუჭნილი'' არ გექნებათ.
ამ პროცედურების შემდეგ დილით უფრო მხნედ და მომხიბვლელად იგრძნობთ თავს.
წყარო: etanews.ge
15 წუთი, რომ ლამაზმა გაიღვიძოთ
⏱️ 1 წთ.
👁️ 6 944
100%