ლამაზი ღიმილი საუკეთესო სავიზიტო ბარათია, ლამაზი ღიმილისთვის კი ჯანსაღი და ლამაზი კბილებია საჭირო. ევროპის ბევრ ქვეყანაში (შვეიცარია, დანია, შვედეთი და სხვ.), ასევე აშშ-ში კბილების დაავადებები გაცილებით იშვიათია, ვიდრე ყოფილი საბჭოთა კავშირის სივრცეში. ეს პროფილაქტიკის მაღალ დონეს უკავშირდებაო, თვლიან “კოლგეიტ-პალმოლივის” კომპანიის სპეციალისტები და არა მარტო ისინი.
საიდან ხვდება პირში ბაქტერიები
პირის ღრუს მიკროფლორა ჩვენი ორგანიზმის განუყოფელი ნაწილია. პირველი ბაქტერიები მასში დაბადებისთანავე, პირველი ჩასუნთქვისას სახლდება. თითოულ ადამიანს მიკროფლორის მრავალი ფაქტორით (ჰიგიენა, კვება, ორგანიზმის საერთო მდგომარეობა და ა. შ.) განპირობებული ინდივიდუალური შემადგენლობა აქვს.
პირის ღრუს მიკროფლორაში მავნე ბაქტერიებიცაა და სასარგებლოც. უკანასკნელნი საჭმლის მონელებაში მონაწილეობენ, დაცვას აძლიერებენ და დაავადებების გამომწვევ ბაქტერიებს გამრავლებაში უშლიან ხელს.
მავნე ბაქტერიები პირველი კბილის ამოჭრისთანავე ჩნდებიან, ცუდად მოვლის შემთხვევაში კი, სწრაფად მრავლდებიან, დევნიან “სასარგებლო” სახეობებს და ნადებს აჩენენ. ამ ნადებში მავნე ბაქტერიები მჭიდროდ ეკვრიან ერთმანეთს და კბილის ზედაპირს, მრავლდებიან, ფენებად ედებიან და გამოყოფენ ნივთიერებებს, რომლებიც დაავადებებს უწყობს ხელს.
მნიშვნელოვანია, რომ ეს ბაქტერიები ადვილად გადაეცემა ერთი ადამიანიდან მეორეს ნერწყვის საშუალებით. დადგენილია, რომ ერთ ოჯახში მცხოვრები ადამიანების (შვილები, მშობლები, ქმრები, ცოლები) მიკროფლორა შემადგენლობით ერთმანეთს ჰგავს. ამიტომ თქვენი ღრძილებისა და კბილების სიჯანსაღე უშუალო კავშირშია თქვენი ოჯახის წევრების პირის ღრუს ჯანმრთელობასთან.
როგორ ვითარდება კარიესი
სანამ ბაქტერია ცოტაა, ორგანიზმი მას უმკლავდება. მაგრამ თუ ნადებს არ ვიშორებთ, ბაქტერიები გამრავლებას განაგრძობენ. განსაკუთრებით ინტენსიურია ეს პროცესი ტკბილი და რბილი საკვების მიღების დროს. შედეგად ნადები სქელდება და მწიფდება, რასაც საშუალოდ 12-20 საათი სჭირდება. მჟავა თანდათან ემალზე მოქმედებს იქ, სადაც ნადები ეხება. ასე იწყება კარიესი – კბილის მაგარი ქსოვილის რღვევის პროცესი – (ცარიეს — "ლპობა", ლათ.).
რით არის კარიესი საშიში
თუ კარიესს არ ვუმკურნალებთ, დაავადების გამომწვევი ბაქტერიები სწრაფად აზიანებენ კბილის მაგარ ქსოვილს და შიგნით აღწევენ. ვითარდება პულპიტი – კბილის ნერვის ანთება. ანთებული ნერვის გავლით ბაქტერიები პერიოდონტამდე აღწევენ და პერიოდონტიტს იწვევენ, რომელსაც ზოგჯერ კბილის დაკარგვა მოჰყვება. მკურნალობა სერიოზული და რთული ამოცანაა. არადა ბაქტერიების გამოყოფილი ტოქსინები დაზიანებული პულპისა და პერიოდონტის საშუალებით სისხლში ხვდებიან ხოლმე და ქრონიკული დაავადებების პროვოცირებას ახდენენ (თირკმლების, გულის, კუჭ-ნაწლავის ტრაქტის, სახსრებისა და სხვ.).
ღრძილების ტკივილის მიზეზი
სამწუხაროდ, პრობლემები კარიესით არ მთავრდება. ღრძილების სისხლდენა, უსიამოვნო სუნი, ღრძილების ტკივილი, ჩირქი, ქვები – ამათგან ერთი სიმპტომი მაინც ჩვენთვის ნაცნობია. მათ გაჩენაშიც ნადების გამომწვევი მიკრობები არიან დამნაშავე - იგივე მავნე ბაქტერიები, მაგრამ განსხვავებული სახეობის, იწვევს არამარტო კარიესს, არამედ ღრძილების (პაროდონტის) დაავადებასაც.
დაავადების დასაწყისი სტადია გინგივიტია – ღრძილების ანთება და სისხლისდენა, რომელიც ცუდი ჰიგიენის გამო ჩნდება. ამ სტადიაში დაავადება უფრო ადვილად იკურნება. მაგრამ თუ ანთებითი პროცესი ღრძილის სიღრმეში აღწევს, დაავადება ახალ სტადიაში გადადის - მას პაროდონტიტი ჰქვია. მისი მკურნალობა ძალიან რთულია და ხშირად კბილის წვენასაც იწვევს.
რომ არ გამოგრჩეთ დაავადების დაწყება და დროულად იმკურნალოთ, ღრძილების მდგომარეობას ყოველთვის მიაქციეთ ყურადღება. ქვემოთ დასახელებული სიმპტომებიდან ნებისმიერი იმის ნიშანია, რომ სტომატოლოგთან წასვლის დროა:
• ღრძილებიდან სისხლი გდით ჭამისას ან გახეხვისას;
• წითელი, დასიებული ღრძილები;
• ღრძილი შორდება კბილს;
• ღრძილზე ზეწოლისას ჩნდება ჩირქი;
• მდგრადი უსიამოვნო სუნი პირის ღრუდან.
უსიამოვნო სუნი
ღრძილების ანთებითი დაავადებების დროს, გინგივიტის ან პაროდონტიტის დროს ბაქტერიები აქტიურად მრავლდებიან ღრძილის ქვეშ, ალპობენ საჭმლის ნარჩენებს და იწვევენ უსიამოვნო სუნს. ამასთან ერთად დაავადება კბილების მოვლასაც ართულებს, რაც ნადების ზრდას აჩქარებს. შესაბამისად, ძლიერდება უსიამოვნო სუნიც. თუ ბჟენები და პროთეზები არსებობს, ნადების დამატებითი ნიადაგია ბჟენის მასალა და ნაპრალი პროთეზსა და ღრძილს შორის. გარდა ამისა, ნადებში არის ბაქტერიები, რომლებიც გოგირდის მფრინავ ნაერთებსაც გამოყოფენ. სწორედ ეს ნაერთებია ძირითადი აირები, რომლებიც უსიამოვნო სუნს სძენს ამოსუნთქულ ჰაერს. კბილებისა და ღრძილების გარდა, მიკრობები ენის ძირშიც გროვდება.
დაავადების აღკვეთა უფრო ადვილი და იაფია, ვიდრე მისი მკურნალობა. ამიტომ:
• გაიხეხეთ კბილები დღეში ორჯერ – საუზმის შემდეგ და ძილის წინ;
• დაიცავით კბილის წმენდის წესები;
• კბილის საწმენდი ძაფით დღეში ერთხელ მაინც გაასუფთავეთ კბილებს შორის სივრცე;
• თქვენი კბილებისა და რძილების შესაფერისი კბილის ჯაგრისი შეარჩიეთ;
• 6 თვეში ერთხელ მაინც ეწვიეთ სტომატოლოგს.
წყარო: eva.ge
ვუვლით კბილებს წესების დაცვით
⏱️ 1 წთ.
👁️ 2 502
100%