სახლის პირობებში, მკვებავი კრემის მომზადება, ნებისმიერ თქვენგანს შეუძლია და სულაც არ წარმოადგენს სირთულეს. რაც მთავარია, დარწმუნებული იქნებით, რომ თქვენ საკუთარი თავისთვის მხოლოდ საუკეთესო ინგრედიენტებს შეარჩევთ. კრემები, ძირითადად, სხვადასხვა კოსმეტიკური ცხიმებისგან მზადდება.
ჩვენ შემოგთავაზებთ საბაზისო რეცეპტს. თქვენ შეგიძლით მასში შემავალი ცხიმები და ეთერზეთები, თქვენი კანის ტიპის შესაბამისად შეცვალოთ. მაგ: ნუშის ზეთის ნაცვლად, ზეითუნის ან ნებისმიერი სხვა ზეთი გამოიყენოთ, შის ცხიმის ნაცვლად, კაკაოს ან ქოქოსის ცხიმი და ა.შ.
კრემის მომზადების დროს, საჭიროა, შემდეგი პროპორციების გათვალისწინება: მშრალი კანისთვის 40 % ცხიმი, 60 პროცენტი წყალი, ნორმალური კანისთვის 20 % ცხიმი 80 % წყალი, ცხიმიანი და კომბინირებული კანისთვის კი, 15 %-მდე ცხიმი 85%-მდე წყალი. თუმცა, არ არის სავალდებულო ზუსტად ასეთი თანაფარდობის დაცვა.
აუცილებლად გაასტერილეთ ყველა ის ინვენტარი, რომელსაც კრემის მომზადების დროს გამოიყენებთ!
კოსმეტიკური ზეთების შერჩევისას, აუცილებლად უნდა გაითვალისწინოთ, გაქვთ თუ არა, რომელიმე მათგანზე ალერგია. თუ ალერგია გაქვთ მაგ. ნუშზე, ნუშის ზეთი, სხვა ზეთით ჩაანაცვლეთ. ასეთი კრემები, ინახება მაცივარში ან უბრალოდ გრილ ადგილზე, 1-2 თვის განმავლობაში. წაისვით სახეზე და ყელზე კრემი, კანი მას შეიწოვს, 20-40 წუთის შემდეგ კი, რაც არ შეიწოვება, ხელსახოცით მოიცილეთ.
მასალა:
შის ცხიმი - 10 გრ;
ნუშის ზეთი - 10 გრ;
სპერმაცეტი - 2 გრ;
ცვილი - 4 გრ;
გვირილის ნაყენი ან გამოხდილი წყალი - 25 მლ;
ბორაქსი - დანის წვერით;
ზეთოვანი "ე" ვიტამინი - 3 წვეთი;
ვარდის ეთერზეთი - 3 წვეთი;
ჟასმინის ეთერზეთი - 4 წვეთი.
მომზადება
1. მოამზადეთ ცხელი ნაყენი გვირილით: 1 სავსე ჩაის კოვზ გვირილას დაასხით 50 მლ მდუღარე. გააჩერეთ 40 წუთი. გაგრილებისას, დაუმატეთ ბორაქსი დანის წვერით და კარგად გახსენით.
2. შის ცხიმი, ნუშის ზეთი, სპერმაცეტი და ცვილი, შუშის ქილაში მოათავსეთ და დადგით წყლის აბაზანაზე, დაბალ ცეცხლზე, თან გამუდმებით ურიეთ. როგორც კი ცვილი და სპერმაცეტი გადნება, გადმოდგით და გააციეთ.
3. როცა გვირილის ნაყენიც და ცხიმის მასაც გაცივდება, ფრთხილად შეურიეთ ერთმანეთში, ნელ-ნელა დაამატეთ წყლის მასა ცხიმიან მასას და თან თქვიფეთ მიქსერით. ბოლოს კი დაამატეთ ეთერზეთები, ”ე” ვიტამინი და თქვენი მკვებავი კრემი მზადაა!
წყარო: presa.ge
მკვებავი კრემის მომზადება სახლის პირობებში - რჩევები ქალბატონებს
⏱️ 1 წთ.
👁️ 4 976
100%