ანევრიზმა წარმოადგენს სისხლძარღვის არანორმალურ გაფართოებას, რომლის დროსაც აღინიშნება მედილაური შრის ბოჭკოვანი ქსოვილის გაჭიმვა. ანევრიზმის ყველაზე ხშირი მიზეზია ათეროსკლეროზი. სხვა ეტიოლოგიური ფაქტორებია ტრავმა, ინფექცია, არტერიული ჰიპერტენზია და სხვა. გამოყოფენ აორტის ანევრიზმის შემდეგ მორფოლოგიურ ფორმებს:
1. თითისტარისებრი. ამ ტიპის ანევრიზმისთვის დამახასითებელია სისხლძარღვის გაფართოება ყველა მიმართულებით, მთელ გარშემოწერილობაზე, რაც მას თითისტარისებრ ფორმას ანიჭებს. 2. ტომრისებრი. ასეთი ანევრიზმა მოიცავს სისხლძარღვის გარშემოწერილობის მხოლოდ ნაწილს. იგი ტომარასავით არის ჩამოკიდებული სისხლძარღვზე. 3. განშრევებადი ანევრიზმა. მისთვის დამახასიათებელია დაზიანებული ინტიმისგან სისხლის გაჟონვა მედიალური შრის გასწვრივ. ლოკალიზაციის მიხედვით არჩევენ: აღმავალი აორტის ანევრიზმას, აორტის რკალის ანევრიზმას, დაღმავალი აორტის გულმკერდის ნაწილის ანევრიზმას, მუცლის აორტის ანევრიზმას.
გულმკერდის აორტის ანევრიზმის კლინიკური მანიფესტაციის საფუძველია ანევრიზმის მიმდებარე ქსოვილებზე ზეწოლა. ჩივილები ძირითადად გულმკერდის არეში ტკივილით არის წარმოდგენილი, რომელიც არის ყრუ, მღრღნელი ხასიათის. მზარდი ტკივილი შეიზლება აორტის გახეთქვის მომასწავლებელი იყოს. აორტის ანევრიზმის დროს შეიძლება აღინიშნოს არტერიული წნევის მნიშვნელოვანი სხვაობა ზედა კიდურებს შორის.
რენტგენოგრამაზე ანევრიზმა ვლინდება პათოლოგიური წარმონაქმნის სახით, რომლის კედელშიც შეიძლება გამოისახოს კალციფიკატები. ულტრაბგერა, როგორც წესი ზუსტ ინფორმაციას იძლევა ანევრიზმის ლოკალიზაციისა და ზომის შესახებ. კომპიუტერული ტომოგრაფია საშუალებას იძლევა ზუსტად შეფასდეს ანევრიზმის ზომა და მდებარეობა. მეტად ინფორმატიულია ასევე მაგნიტურ ბირთვული რეზონანსი.
ნებისმიერი ლოკალიზაციის ანევრიზმა შეიძლება გართულდეს განშრევებით ან გასკდომით და განვითარდეს სისტემური ემბოლიზაცია. აორტის ანევრიზმის ქირურგიული მკურნალობა გულისხმობს მის ამოკვეთას. ოპერაციული მკურნალობა აუცილებელია, თუ ანევრიზმას თან ახლავს თრომბოემბოლიური გართულებები. სასწრაფო ქირურგიულ ჩარევას საჭიროებს გასკდომაზე საეჭვო ან სწრაფად მზარდი ანევრიზმები. თუ ანევრიზმის ზომა აჭარბებს 5 სმ-ს რეკომენდირებულია ქირურგიული მკურნალობა.
წყარო: med-doctor.net
აორტის ანევრიზმა
⏱️ 1 წთ.
👁️ 4 794
100%