კიტრის „კლასიკური“ ლოსიონი:
* 1 ც წვრილ სახეხზე გახეხილი მომცრო ზომის კიტრი, დაასხით არაყი (1/1) და 2 კვირის განმავლობაში მჭიდროდ თავდახურულ ჭურჭელში დააყოვნეთ. ამგვარად დამზადებული ლოსიონი შეგიძლიათ მაცივარში შეინახოთ, გამოყენების წინ კი დოლბანდში გაწუროთ და გადადუღებულ ცივ წყალში (1/1) გადააზავოთ.
* თუ მშრალი სახის კანი გაქვთ, საჭიროა წყლის რაოდენობის (1/2) გაზრდა და ლოსიონში 1 ჩ.კ. გლიცერინის ჩამატება.
* პიგმენტური ლაქების არსებობისას კი კარგი იქნება, თუ ლოსიონში რამდენიმე წვეთ ლიმნის წვენსაც ჩაამატებთ. ამგვარად მომზადებული ლოსიონი შეგიძლიათ არა მარტო სახეზე, არამედ ყელსა და დეკოლტეზეც შეიზილოთ.
* თუ ამ პროცედურას რეგულარულად ჩაიტარებთ, კანი საოცრად რბილი და ხავრდოვანი გაგიხდებათ, ფერიც გაგიუმჯობესდებათ და რაც მთავარია, პიგმენტურ ლაქებსაც მოიშორებთ.
კიტრის სქრაბი (სახისა და ტანისთვის):
3 ცალი მოზრდილი კიტრი გახეხეთ მსხვილ სახეხზე, დაამატეთ 4 ს.კ. სახამებელი (კრახმალი), მსხვილად დაფქვილი (ნალექიანი) ყავა და აურიეთ.
მიღებული მასა (დუშის მიღების წინ) სახისა და ტანის კანზე მსუბუქი, წრიული მოძრაობებით შეიზილეთ და შემდეგ ჩამოიბანეთ.
მათეთრებელი ნიღაბი კიტრისგან:
* გახეხეთ კიტრი წვრილ სახეხზე, შეურიეთ ათქვეფილი კვერცხის ცილა, რამდენიმე წვეთი ლიმნის წვენი და მიღებული მასა წაისვით სახეზე მანამ, სანამ არ გაშრება.
* გაშრობისთანავე სახე ჯერ ქაღალდის ხელსახოცით მოიწმინდეთ, შემდეგ კი მინერალური წყლით ჩამოიბანეთ.
კიტრის მკვებავი ნიღბები:
1. მშრალი კანისთვის : გახეხეთ კიტრი წვრილ სახეზე და მიღებული მასა 1/1-ზე პროპორციით არაჟანში გადაურიეთ (მაგ: 1 ს.კ. გახეხილი კიტრი და 1 ს.კ. არაჟანი). მიღებული მასა წაისვით სახესა და ყელზე, 15 წუთის შემდეგ კი ნელთბილი წყლით ჩამოიბანეთ.
2. კომბინირებული კანისთვის: გახეხეთ კიტრი წვრილ სახეხზე, დაამატეთ 1 ს.კ. მზესუმზირის ზეთი, 1 ს.კ. რძე და 1 ს.კ. ხაჭო. კარგად გადაურიეთ, დაიდეთ სახეზე, 15 წუთის შემდეგ კი ნელთბილი წყლით ან მინერალური წყლით (უკეთესია) ჩამოიბანეთ.
3. ფერმკრთალი და უსიცოცხლო კანისთვის: გახეხეთ კიტრი წვრილ სახეხზე და 1/1-ზე პროპორციით თაფლთან გადაურიეთ. დაიდეთ მიღებული მასა სახეზე, 10 წუთი გაიჩერეთ და შემდეგ ოთახის ტემპერატურის წყლით კარგად ჩამოიბანეთ.
კიტრის ნიღაბი მოშვებული ყელისთვის:
* საკმარისი რაოდენობის კიტრი დაჭერით ძალიან თხელ ნაჭრებად, ეს ნაჭრები ყელზე დაიფინეთ და ზემოდან მარლის სახვევით გადაიხვიეთ.
* 20-25 წუთის შემდეგ სახვევი მოიხსენით, კიტრის ნაჭრები ყელიდან მოიცალეთ, კანი არ ჩამოიბანოთ და ყელზე პირდაპირ მკვებავი კრემი შეიზილეთ.
* თუ ამ პროცედურას რეგულარულად ჩაიტარებთ, თქვენი ყელი გაცილებით სუფთა და გლუვი გახდება და ახალგაზრდულ იერსაც დიდხანს შეინარჩუნებთ.
თქვენ წარმოიდგინეთ, კიტრისგან შესანიშნავი თმის ნიღბების დამზადებაც შეიძლება. ამჯერად ერთ-ერთი მათგანის რეცეპტს შემოგთავაზებთ:
თმის ნიღაბი კიტრისგან:
* 1 ცალი მომცრო ზომის კიტრი წვრილად გახეხეთ. 1 ც. კვერცხი (გულიან-ცილიანად) ათქვიფეთ, დაამატეთ 1 ს.კ. თაფლი, 1 ს.კ. ზეითუნის ზეთი და კარგად გადაურიეთ (სანამ პიურესმაგვარ მასას არ მიიღებთ).
* მიღებული მასა თმაზე (ძირიდან ბოლოებამდე) და თავის კანზე თანაბრად შეიზილეთ და 10 წუთით გაიჩერთ. ამის შემდეგ თავი თბილი წყლით ჩამოიბანეთ.
* ეს ნიღაბი გარდა იმისა, რომ სწრაფად აღადგენს თმის სტრუქტურას და ხელს უწყობს მის ზრდას, თავის კანსაც კვებავს.
* საუკეთესო შედეგის მისაღწევად, რეკომენდებულია აღნიშნული პროცედურის კვირაში ერთხელ ჩატარება.
გისურვებთ სილამაზეს და ჯანმრთელობას!
funtime.ge