როგორ შეარჩიოთ და შეინახოთ ზეთი



ზეთის კვებითი ღირებულება და კულინარიული დანიშნულება მისი მიღების მეთოდზეა დამოკიდებული. ნედლეულიდან (ზეთისხილი, სოიო, მზესუმზირა) მცენარეული ზეთის მიღება სხვადასხვა მეთოდებითაა შესაძლებელი.

დაწნეხით მიღებული ზეთი უფრო სასარგებლოა. განსაკუთრებით მაშინ, როცა ის ცივი გამოხდის მეთოდითაა მიღებული. ასეთ ზეთში მაქსიმალურადაა შენარჩუნებული ყველა ვიტამინი და მინერალი.
არსებობს შემთხვევები, როდესაც ნედლეულს აცხელებენ და ისე წნეხავენ. ასეთი ზეთი უფრო მუქი და არომატულია, სამაგიეროდ კარგავს სასარგებლო ნივთიერებებს.

ექსტრაქციითაა მიღებული ზეთი, როდესაც ნედლეულს ორგანული გამხსნელებით ამუშავებენ. (ჰექსანით – ბენზინის ანალოგით) მიღებულ ზეთს კი სხვა ქიმიური პროცედურებით ჰექსანს აშორებენ. ექსტრაქციით მიღებული ზეთი, როგორც წესი, უფრო იაფია და გაცილებით ღარიბია სასარგებლო ნივთიერებებით. ამასთანავე, ასეთ ზეთში შეიძლება შემორჩეს გამხსნელი ნივთიერებები და სხვა ქიმიური მინარევები.

მოკლედ, ყველაზე სასარგებლო ზეთი ცივი დაწნეხვით მიღებული ზეთია. ნედლეულიდან ზეთის გამოხდის შემდეგ, აუცილებელია მისი რაფინირება, რის გარეშეც ზეთი ხანგრძლივი პერიოდის განმავლობაში ვერ შეინახება. რაფინირება, თავის მხრივ, ზეთზე კვლავ ქიმიური საშუალებებით ზემოქმედებას გულისხმობს, ამიტომ რაფინირებული ზეთი უკვე აღარ არის ისეთი სასარგებლო, როგორიც მანამდე იყო.

როგორ შეარჩიოთ ზეთი?


1. თუ ზეთი გაუცხელებლად უნდა გამოიყენოთ, ეცადეთ ნახევრად რაფინირებული ან არარაფინირებული შეიძინოთ. ხოლო თუ რაიმეს შესაწვავად გინდათ სჯობს რაფინირებულის შეძენა.
2. შეამოწმეთ შენახვის ვადა, რადგან არარაფინირებული ზეთი მხოლოდ 3-8 თვეს იხმარება. მოერიდეთ ზეთებს, რომლის შენახვის ვადა 2 წელზე მეტია, ასეთ ზეთებს დამატებული აქვთ სპეციალური ანტიოქსიდები, რაც ადამიანის ჯანმრთელობისთვის სახიფათოა.
3. რაფინირებული ზეთი უნდა იყოს სუფთა და კრიალა, ნალექის გარეშე. არარაფინირებული ზეთი ხშირად ნალექიანია.
4. თუ ზეთს აწერია, რომ არ შეიცავს ქოლესტერინის ეს მხოლოდ სარეკლამო ტყუილია და არ იფიქროთ, რომ ის რამით გამოირჩევა. ქოლესტერინი მხოლოდ ცხოველურ პროდუქტებშია და მცენარეული ზეთი მას არ შეიცავს.
5. გაითვალისწინეთ რომ ნამდვილი, კარგი ხარისხის ზეთი ძვირი ღირს და ის აუცილებლად შუშის ბოთლში უნდა იყოს ჩასხმული.
6. ყველაზე საუკეთესო ზეთი “Virgin Olive Oil” არის, რომელიც მიღბულია მხოლოდ ფიზიკური მეთოდების გამოყენებით, ქიმიური გაწმენდის გარეშე.

როგორ შეინახოთ ზეთი?


იმისთვის, რომ ზეთმა სასარგებლო თვისებები შეინარჩუნოს, უნდა შეინახოთ სიბნელეში, 5-20 გრადუს ტემპერატურაზე. არარაფინირებული ზეთი უმჯობესია მაცივარში, მინის ჭურჭლით შეინახოთ. ჯანგბადისა და ტენისგან დასაცავად, ეცადეთ ზეთის ბოთლს თავსახური ყოველთვის დააფაროთ. ერთხელ გამოყენებული ზეთის ხელმეორედ გამოყენება ჯანმრთელობისთვის საზიანოა.

წყარო: active.ge
































ტექსტის სანახავად გაიარეთ რეგისტრაცია.