მხიარული კომპანია და საერთო მიზანი - შეხვედრისა და დროის ერთად გატარების შესანიშნავი საბაბია! ასე რომ... ყველაფერი უკიდურესად მარტივია, მიჰყევით ინსტრუქციებს და ყველაფერი გამოგივათ!
ნაბიჯი 1-ლი
პირველ რიგში, გააზრებულად შეადგინეთ მოსაწვევთა სია. მეხსიერებაში გადაარჩიეთ ყველა მეგობარი, რომელთაც რამენაირად მაინც გამოუხატავთ სურვილი ”თავის ფორმაში მოყვანისა” და იმ რამდენიმე კილოგრამის მოშორებისა, რომელიც სიცოცხლეს უწამლავს. გახსოვდეთ, თქვენი ამოცანაა, შეკრიბოთ ადამიანები, რომლებსაც ნამდვილად სურთ წონაში დაკლება. ამიტომ, ნუ მიისწრაფით იმისკენ, რომ ბევრი ხალხი მოიწვიოთ, ეს შეიძლება იყოს არა უმეტეს ხუთი-ათი ადამიანისა.
ნაბიჯი2
დააგზავნეთ ”მოსაწვევი ბარათები.” შეეცადეთ, მიმზიდველი, ლამაზი იყოს, მხიარული. მაგალითად, სასწორის გამოსახულებით. მოსაწვევში ჩაწერეთ რამე მოწოდება, შთამბეჭდავი ტექსტის სახით, რომელიც ჩანაფიქრის შინაარსს გამოხატავს: ”გინდათ, მოიცილოთ რამდენიმე ზედმეტი კილოგრამი? მაშინ თავი დაანებეთ სასწორის ძაგებას და შემოგვიერთდით, მიიღეთ მონაწილეობა ჩვენს არაჩვეულებრივ წვეულებაში, რომელიც ზედმეტ წონასთან ბრძოლას ეძღვნება! სახალისო აქცია იქნება, მეგობრობითა და დაბალკალორიული პროდუქტებით განმტკიცებული! მოდი, დავემშვიდობოთ უსარგებლო კილოგრამებს მთელი ჩვენი მეგობრული გაერთიანებით!” არ დაგავიწყდეთ, სჯობს, მოსაწვევები ადრესატებს დაგეგმილ ღონისძიებამდე 2 კვირით ადრე გაუგზავნოთ.
ნაბიჯი 3
სტუმრებს მოუმზადეთ ჯანსაღი საკვები. რაღა თქმა უნდა, კერძები, რომლებიც სუფრას დაამშვენებს, უნდა იყოს ნაკლებად ცხიმიანი და დაბალკალორიული (როგორც წასახემსებელი, ისე დესერტები და, მით უმეტეს, ცხელი კერძები).
იდეა საუზმესთან დაკავშირებით: ეს შეიძლება იყოს სინი ვეგეტარიანული საკვებით, დაბალკალორიული სოუსის დამატებით. წონის დამკლებთა კომპანიისთვის სრულიად შესაფერისია კრევეტები ან ზღვის კოქტეილი, ჰაეროვანი სიმინდი, სხვადასხვა სახის ხილი და კენკრა, მათ რიცხვში ეგზოტიკურიც, ცხიმმოხდილი ნაყინი. იზრუნეთ დაბალკალორიული უალკოჰოლო სასმელის მარაგზე, ასეთია უშაქრო ჩაი.
ნაბიჯი 4
მას შემდეგ, რაც სტუმრები ისიამოვნებენ გულითადი გამასპინძლებით, ერთად იმსჯელეთ წონის დაკლების სტრატეგიაზე. მიეცით ყველა მოწვეულს საშუალება, გამოთქვას აზრი, გაგანდოთ მოკლევადიანი გეგმები გახდომის შესახებ და გაგიზიაროთ დადებითი გამოცდილება, რომელიც მას დაეხმარა წარსულში წონის დაკლებაში. კოლექტივს შეუძლია, დაეხმაროს ყოველ მონაწილეს ინდივიდუალური გეგმის მკვეთრად ჩამოყალიბებაში და მის განხორციელებაში უახლოეს დროში. მაგალითად, ერთი თვის ვადაში.
დაურიგეთ სტუმრებს ფურცლები, საწერი კალმები, ფანქრები, რათა განხილვის დროს ჩანიშვნა შეძლონ. დისკუსიის ბოლოს ყოველმა მონაწილემ კონკრეტულად უნდა დააფიქსიროს ფურცელზე თავისი მიზნები და მათი რეალიზაციის საშუალებები. კამპანიამ უფრო მეტი სარგებელი რომ მოგიტანოთ, ყოველ ადამიანს წონის დაკლებაში პარტნიორი ისე დაუნიშნეთ, რომ ორივე მონაწილემ ერთმანეთის მხარდაჭერა უახლოესი 30 დღის მანძილზე შეძლოს. მხარდაჭერა შეიძლება გამოიხატოს სატელეფო კავშირით, ელექტრონული წერილებით ან პირადი შეხვედრებით.
ნაბიჯი 5
დათქვით შეხვედრა ერთი თვის შემდეგ, რათა ერთმანეთს თქვენი მიღწევები გაუზიაროთ და წონის დაკლების ერთობლივ პროგრამაში ახალი საზღვრები დააწესოთ.
გისურვებთ წარმატებებს!
წყარო: eva.ge