მწვანე პომიდორი ნიგვზით - რეცეპტი - კულინარია

პომიდორი ნაყოფს ოქტომბრის ბოლომდე ისხამს, მაგრამ დამწიფებას ვეღარ ასწრებს და წელიწადის ამ დროს ბაზარი სავსეა მწვანე პომიდვრით. თავისი უნიკალური გემოვნური თვისებების დამსახურებით კი, პომიდორი კულინარიაში დაუმწიფებელი სახითაც გამოიყენება. პომიდვრის ნაყოფი უამრავ სასარგებლო ნივთიერებას შეიცავს, მათ შორის, 3,5-დან 8,5%-მდე ორგანულ მჟავებს, ნატრიუმს, კალციუმს, მაგნიუმს, რკინას, B1, B2, PP ვიტამინებს და ა.შ.

ინგრედიენტები:

მწვანე პომიდორი - 2-3 კგ.
ნიგოზი - დაახლოებით 1 ჭიქა
ხახვი - 1/2 კგ.
ქინძი, ოხრახუში, ნიახური - თითო კონა
ნიორი - 1/2 თავი
უცხო სუნელი - 2 სუფრის კოვზი
ხმელი ქინძი - 2 სუფრის კოვზი
ზაფრანა - 1 სუფრის კოვზი
ზეთი - 1/2 ჭიქა
დაფქული წიწაკა, მარილი და ძმარი - გემოვნებით.



პომიდორი კარგად გარეცხეთ და ჯვარედინად ჩაჭერით.
ფართო ტაფაზე დაასხით ზეთი, მოაწყვეთ პომიდორი, დააფარეთ თავსახური და დაბალ ცეცხლზე ან ჰაერღუმელში შეწვით (ჰაერღუმელის შემთხვევაში, ტაფისთვის თავზე დაფარება საჭირო არაა).
სანამ პომიდორი იწვება, ცალკე ჯამში ჩაყარეთ დაჭრილი ხახვი, მწვანილი, დანაყილი ან გატარებული ნიგოზი და ნიორი, სუნელები, წიწაკა და ძმარი.
პომიდორს პერიოდულად მოურიეთ. კარგად რომ დარბილდება და შეიწვება, ტაფა ცეცხლიდან გადმოდგით, პომიდორს გაგრილება აცადეთ და შემდეგ უკვე გამზადებულ საკმაზში კარგად აურიეთ.
ამ კერძს ჩვენი ბებიები ცხელ მჭადთან ერთად მიირთმევდნენ.

funtime.ge