გავაძლიეროთ ანტიბიოტიკებით დასუსტებული ორგანიზმი



ავადმყოფობის პერიოდში ანტიბიოტიკებს იღებდით? მაშინ გამოჯანმრთელებისთანავე იმუნიტეტის აღდგენაზე იზრუნეთ. სხვაგვარად უსიამოვნო შედეგებს თავს ვერ დააღწევთ.
ორგანიზმზე ზემოქმედებისას ანტიბიოტიკები არამხოლოდ მავნე მიკრობებს, ასევე სასარგებლო ბაქტერიებსაც ანადგურებს. გასაკვირი არ არის, რომ მათი მიღების შემდეგ პაციენტის მდგომარეობა არასახარბიელოა. იმუნიტეტის ამაღლებას რამდენიმე ნაცადი საშუალება ეხმარება.

მჟავე გარემოს აღდგენა
ანტიბიოტიკების ზემოქმედების შემდეგ ორგანიზმი მჟავე გარემოს სახით, დამცავ ბარიერს მოკლებულია. ამიტომ ამ პერიოდში დიარეა, დისბაქტერიოზი, სტომატიტი და პირის ლორწოვანზე წყლულები ვლინდება. ამ უსიამოვნების დაძლევა მჟავე გარემოს აღდგენით შეიძლება. როგორ გააკეთოთ ეს?
კვების რაციონში ჩართეთ მჟავე კიტრი, კომბოსტოს მწნილი, მაწონი, იოგურტი და კეფირი.
მიიღეთ პრებიოტიკები (პრეპარატები, რომლებიც რძის მჟავე ბაქტერიების კონცენტრატს შეიცავენ).

ორგანიზმის გაწმენდა
ანტიბიოტიკების მიღების დროს ყველაზე მეტად ღვიძლი იტანჯება. ამ პერიოდში განუწყვეტელი მუშაობა უწევს, ვინაიდან წამლების მავნე შემადგენლობებისგან ორგანიზმი სრულად უნდა გაასუფთაოს. დაეხმარეთ. ანტიბიოტიკების მიღების პერიოდში და შემდგომ ორ კვირაში უარი თქვით ალკოჰოლზე. ორგანიზმს კარგად ასუფთავებს ჭინჭრის ჩაი.
2 ჩაის კოვზ ჭინჭრის გამხმარ ფოთლებს 2 ლიტრი მდუღარე დაასხით. 10–15 წუთი დადგით. ერთი დღის განმავლობაში ჩვეულებრივი ჩაის მაგივრად დალიეთ.
ამ სასარგებლო ჩაის გარდა, კარგად ეხმარება აბანო ან საუნა. ანტიბიოტიკების მიღების შემდეგ ორგანიზმში დარჩენილი ყველა ტოქსინი ოფლთან ერთად გამოდის.

იმუნიტეტის დაცვა
ანტიბიოტიკების მიღების შემდეგ იმუნიტეტი გარკვეულწილად ქვეითდება. როგორ აიმაღლოთ? შესანიშნავ ბუნებრივ იმუნოსტიმულატორად ითვლება ჟენშენი, ექინაცია და ელეუტეროკოკი. საკონსულტაციოდ ექიმს მიმართეთ. ზოგიერთი მათგანი რეკომენდებულია დაბალწნევიანებისთვის, სხვები პირიქით, წნევას აქვეითებენ. ამის გათვალისწინება აუცილებელია.
კვების რაციონი ვიტამინებითა და მიკროელემენტებით გაამდიდრეთ. მაგალითად, ს ვიტამინის მისაღებად ხილისა და ბოსტნეულის ახალგამოწურული წვენი დალიეთ, გამოიყენეთ ციტრუსოვნები და მწვანე ხახვი. ვიტამინების ნამდვილი საკუჭნაოა ნატურალური თაფლი. წესად გაიხადეთ, უზმოზე თაფლიანი წყალი დალიოთ (1 ჭიქა თბილ წყალზე 2 სურფის კოვზი თაფლი).
ორგანიზმი გაიკაჟეთ. იმუნიტეტს შესანიშნავად ამაღლებს კონტრასტული შხაპი. ვისთვისაც ამის გაკეთება ძნელია, ვურჩევთ, გაკაჟება ფეხებიდან დაიწყოს. მოამზადა აზა გაგოშიძემ, ჟურნალი სარკე


წყარო: sana.ge
































ტექსტის სანახავად გაიარეთ რეგისტრაცია.