ბოლო დრომდე ცრუმორწმუნე დედები თავიანთ ჩვილებს ფრჩხილებს არ აჭრიდნენ, არამედ კბილებით აკვნეტდნენ, იმ საბაბით, რომ სანამ ბავშვი ერთი წლის არ გახდებოდა, მაკრატლის გამოყენება არ შეიძლებოდა. ჩვენში დღემდე ბევრს სჯერა, რომ ბავშვისთვის პირველად დაჭრილ ფრჩხილებს დიდი მნიშვნელობა აქვს და მის მომავალ ბედსაც განსაზღვრავს. ამიტომაცაა, რომ პირველ ფრჩხილებს ან ფორტეპიანოში დებენ (პიანისტი გამოვიდესო), ან წიგნში, რათა ბავშვი განათლებულ ადამიანად გაიზარდოს.
ასეთი ცრურწმენაც იყო ზოგან - თუ ფეხმძიმე ქალი მოჭრილ ფრჩხილს დაადგამს ფეხს, მუცელი მოეშლებაო. ხოლო თუ ბავშვს ორშაბათს დააჭრი ფრჩხილებს სახლის კარის გარეთ - მას ყველა კბილი დასძვრებაო.
ფრჩხილების ფორმისა და სიგრძის, ასევე მასზე დროდადრო გამოჩენილი თეთრი ლაქების მიხედვით მცოდნე ადამიანებს შეუძლიათ მათ პატრონზე გარკვეული ინფორმაციის გაგება, მისი ბედის წინასწარმეტყველება და ამ ადამიანის ხასიათის გაგებაც კი. მაგალითად, თუ ფრჩხილები ირიბად იზრდება და უფრო კლანჭებს წააგავს, ეს ბოროტის ნიშანია ან იმის, რომ ადამიანი სიძუნწისკენ არის მიდრეკილი. თუ ფრჩხილები შუაში იზნიქება, ეს ნაადრევი სიკვდილის ნიშანია. ფრჩხილის ქვედა ნაწილში „ნახევარმთვარის“ ზომა მიანიშნებს, რამდენ ხანს იცოცხლებს ადამიანი - რაც უფრო მსხვილია ნახევარმთვარე, მით უფრო გრძელი და უზრუნველია მისი მფლობელის ცხოვრება.
თეთრი ლაქები ფრჩხილებზე სხვადასხვანაირად იხსნება, იმის მიხედვით, რომელ თითზე ჩნდება. ცერა თითზე - საჩუქარს მიანიშნებს, საჩვენებელზე - მეგობრის მოსვლას, შუაზე - მტრის ან პირიქით, მოულოდნელ საჩუქარს. ნეკზე - გზის მანიშნებელი. შავი ან ყვითელი ლაქა ნებისმიერ თითზე - ცუდი ნიშანია, როგორც წესი, ვინმეს სიკვდილზე მიანიშნებს.
ძველად იმისაც სჯეროდათ, რომ ვინც გამუდმებით იკვნეტდა ფრჩხილებს, მთელი ცხოვრება უბედური იქნებოდა.
წყარო: etanews.ge