ბევრი ადამიანი უარს ამბობს საყვარელ სასმელზე მხოლოდ იმიტომ, რომ ის ჯანმრთელობისთვის საზიანო ჰგონია. არადა, სულაც არ არის იმის აუცილებლობა, რომ ყავით მიღებულ სიამოვნებაზე უარი თქვათ! პირიქით, უკვე ბევრმა კვლევამ დაადასტურა, რომ ისინი, ვინც ამ სასმელს რეგულარულად სვამენ, უფრო ჯანმრთელები არიან, ვიდრე ისინი, ვინც მასზე საერთოდ უარს ამბობენ! ეს, სავარაუდოდ, სასმელში შემავალი ანტიოქსიდანტებისა და მარცვლების ქიმიური შემადგენლობის დამსახურებაა.
იმისათვის, რომ უფრო კარგად გაეცნოთ ყავის თვისებებს, იცოდეთ მისი მავნებლობა-მარგებლობის შესახებ და მშვიდად დააგემოვნოთ საყვარელი არომატული სასმელი, OK! რამდენიმე საინტერესო ფაქტსა და რჩევას გთავაზობთ.
ხარისხი
ეს პროდუქტის ყველაზე მნიშვნელოვანი მახასიათებელია! ყავის შემთხვევაში კი ხარისხი ორმაგად საყურადღებოა. სამწუხაროდ, მაღაზიებში წარმოდგენილ პროდუქტთა უმრავლესობა პესტიციდებითაა სავსე. ამიტომ მანამ, სანამ ყავის ყიდვას გადაწყვეტთ, დააკვირდით მასზე არსებულ წარწერას — შეფუთვაზე უნდა ეწეროს „ორგანული“ (Organic) ან „საერთო წარმოშობის“ (Single Origin). ზოგადად კი, გირჩევთ, საყვარელი სასმელი სპეციალურ მაღაზიებში შეიძინოთ. იქ ხარისხი ყოველთვის უფრო მაღალია, გემო კი — უკეთესი!
მომზადების წესი
მსოფლიოში ყავის მომზადების უამრავი წესი არსებობს. მათგან საუკეთესოს გამოყოფა რთულია, თუმცა, შეგვიძლია გითხრათ ის, რაც თითქმის აკრძალულია! წყალი არავითარ შემთხვევაში არ მოადუღოთ ელექტრო-ჩაიდანში! ყავა კი არასოდეს უნდა მიირთვათ პლასტმასის ან სხვა მსგავსი მასალის ჭურჭლით. მაღალი ტემპერატურის დროს, ასეთი მასალიდან სასმელში უხილავი ნაწილაკები გადადის და ეს არა მხოლოდ გემოზე, არამედ ენდოკრინულ სისტემასა და ჰორმონულ ბალანსზეც უარყოფითად აისახება. იდეალურია, თუ ყავას სპეციალური გასაფილტრი მოწყობილობით მოამზადებთ.
სწორი დრო
კოფეინი ორგანიზმში რამდენიმე საათის განმავლობაში რჩება. ასე რომ, თუ უძილობა გაწუხებთ, ეს სასმელი 14:00 საათის შემდეგ აღარ უნდა მიირთვათ. გარდა ამისა, ყველასათვის საზიანოა ყავის დალევა მშიერ კუჭზე. არასასურველია კოფეინის მიღება ვარჯიშის შემდეგაც. თუმცა, ვარჯიშის დაწყებამდე ესპრესო-ბარში თუ შეივლით, ეს თქვენს ორგანიზმზე მხოლოდ და მხოლოდ დადებითად აისახება, ვინაიდან, ამ შემთხვევაში, ყავა ნივთიერებათა ცვლას აუმჯობესებს და ცხიმის დაწვასაც უწყობს ხელს.
დეტოქსის ეფექტი
ისინი, ვინც საკუთარ ჯანმრთელობაზე ზრუნავენ, კარგად იცნობენ დეტოქსის უპირატესობებს. აღმოჩნდა, რომ ერთი ფინჯანი ყავა ისეთივე სასარგებლოა ორგანიზმისათვის, როგორც სპეციალურად დამზადებული წვენები და სმუსები. საქმე იმაშია, რომ ხარისხიან ყავაში შემავალი ქიმიური ნივთიერებები ნაწლავებს წმენდს, ეს კი დეტოქს-პროგრამების უპირველესი დანიშნულებაა.
იდეალური ტანდემი
ყველამ იცის, რომ სწორი ტანდემი უკეთეს შედეგს განაპირობებს. იმისათვის, რომ ყავამ მეტი სარგებელი მოგიტანოთ, ის რძესთან, კვერცხთან და ხილთან ერთად უნდა მიირთვათ. შესაბამისად, თქვენი საუზმე იდეალური იქნება, თუ კვერცხს მოხარშავთ, ხილის სალათს მოამზადებთ და რძეს მიაყოლებთ. ამ ყველაფრის შემდეგ, ყავა ნამდვილი მისწრებაა!
ასე რომ, საკუთარ თავს არასოდეს უთხრათ უარი ყავით მიღებულ სიამოვნებაზე და გახსოვდეთ, რომ ჯანსაღ ცხოვრების სტილს ჯანსაღი გადაწყვეტილებები განაპირობებს
okmagazine.ge
რჩევები ყავის მოყვარულებს
⏱️ 1 წთ.
👁️ 4 649
100%