- ვიცით, რომ სისხლისმიერ ნათესავებს შორის ქორწინება დაუშვებელია. მერამდენე თაობამდე გრძელდება სისხლისმიერი ნათესაური კავშირი? რომელ თაობაში შეიძლება ქორწინება?
მამა მაკარი:
- სჯულის კანონის მიხედვით, ნათესაური კავშირი, როგორც სისხლისმიერი, ასევე ნათელმირონობითი, გრძელდება ერთნაირი დროით, რომლის მიხედვითაც მეშვიდე თავში, მეხუთე თაობაში - ანუ უკვე შვილთაშვილების შვილების თაობაში ქორწინება შეიძლება. ერთი თაობა, - ვთქვათ, ძმები, დები ან და-ძმანი არის ორი თავი, ბიძაშვილები არის ოთხი თავი, ბიძაშვილისშვილები - უკვე ექვსი თავი და გრძელდება ასე, ანუ მეშვიდე თავი გამოდის მეოთხე თაობა. ასევეა ნათელმირონობის შემთხვევაშიც. სამწუხაროდ, არსებობს ნათლიობით დაკავშირებული ნათესაობის პრობლემა. ხშირად ირღვევა ნათელმირონობითი ნათესაობა. ნათელმირონობით ნათესაობაში რომ არ მოვხვდეთ, ამისთვის უნდა ვიცოდეთ, ვინ იყო ჩვენი წინაპრების, ვთქვათ, ბაბუის ბაბუის ნათლია, თუმცა, ალბათ იშვიათად თუ იქნება ადამიანი, რომელიც დაასახელებს, ვინ იყო ბაბუამისის ბაბუის ნათლია. ნათელმირონობიდან მომდინარე ნათესავებში ქორწინების კონტროლი თითქმის შეუძლებელია. შესაძლებელია, ბევრი ასეთი ნათესავი იყოს ქორწინებაში მხოლოდ იმის გამო, რომ არ იცოდნენ, რომ ნათესავები არიან. თუმცა, დაქორწინებისას ყველანაირად უნდა ვეცადოთ, რომ გამოვიკვლიოთ ნათესაობითი კავშირები.
- ვისზე ვრცელდება ნათელმირონობითი ნათესაობა?
- ნათელმირონობითი ნათესაობა იწყება ნათლიიდან და ნათლულიდან და ნათლულის მშობლებიდან. ნათლიასა და ნათლულის მშობლებს შორის მყარდება ნათესაური კავშირი. რაც შეეხება ნათლულის და-ძმებს, ნათლულის ბიძებს, დეიდებსა და მამიდებს, მათთან ნათლიას ნათესაური კავშირი არა აქვს. ნათესაობა იწყება უშუალოდ ნათლიიდან და ნათლულიდან და ვრცელდება მათ შთამომავლობაზე და ნათლულის მშობლებზე. ერთმანეთის ნათესავები ხდებიან ნათლულის სულიერი და ხორციელი მშობლები, - ნათლია და ხორციელი მშობლები და ნათლიისა და ნათლულის შთამომავლობა.
- ასევე არსებობს მძახლობითი ნათესაობაც.
- სჯულის კანონი კრძალავს მძახლობით ნათესაობაში მყოფთა ქორწინებასაც. ვთქვათ, ადამიანს ჰყავდა ცოლი, დაშორდა მას და მეორედ დაოჯახდა. პირველი ცოლის ნათესავებსა და მეორე ცოლის ნათესავებს (თაობებს ვგულისხმობ) შორისაც კი არ შეიძლება ქორწინება. მართლაც საოცარია, მათ შორის სისხლისმიერი ნათესაური კავშირი არ არსებობს, მაგრამ ეს მოვლენა ქორწინების აკრძალვის მუხლში შედის.
- შეიძლება თუ არა, ორ დედმამიშვილს შორის ქორწინება? ვთქვათ, დებმა იქორწინონ ძმებზე? თუ ასეთი ქორწინება შედგა, როგორ უნდა მოიქცეს ქორწინებაში მყოფი წყვილი?
- ეს არის მძახლობითი ნათესაობა და ამის გამო ორ დედმამიშვილს შორის ქორწინება იკრძალება. არსებობს ნათესაობითი ქორწინების ორი კატეგორია: ერთი, როდესაც აუცილებლად უნდა დაინგრეს, რადგან დაუშვებელია, ხოლო მეორე კატეგორიის ქორწინებაში მყოფ წყვილზე ხდება ეპიტიმიის დადება, მაგრამ ქორწინება არ იშლება. ორ დედმამიშვილს შორის ქორწინება არის ისეთი ქორწინება, რომელიც უნდა დაიშალოს და დაიშალოს ის ქორწინებაც, რომელიც შედგა უფრო მოგვიანებით. თუ ქორწინება მოხდა ისეთი კატეგორიის ნათესავებს შორის, როდესაც ერთი ნაბიჯია დარჩენილი ნათესაობასა და არანათესაობას შორის, მღვდელმთავრის მიერ წყვილს ეძლევა საეკლესიო სასჯელი, ეპიტიმია და ხდება ოჯახის შენარჩუნება, ხოლო თუ ქორწინება ძალიან ახლო ნათესავებს შორის მოხდა, ოჯახი აუცილებლად უნდა დაინგრეს.
- ვინ არიან მძახლობით ნათესაობაში მყოფი ადამიანები?
- მძახლობითი ნათესაობა ვრცელდება ჯვრისწერით შეუღლებული წყვილის, ქალისა და მამაკაცის მშობლებსა და ახლო ნათესავებზე. ისინი უკვე ერთმანეთთან ნათესაურ კავშირში არიან. ნათესაობის ათვლა ამ შემთხვევაშიც ხდება თავების მიხედვით, როგორც ხორციელი და ნათელმირონობითი ნათესაობის შემთხვევაში.
- აისახება თუ არა ნათესაური ქორწინების კვალი უარყოფითად შთამომავლობაზე?
- საერთოდ, ნათესაური ქორწინება არის ცოდვა. წინაპრის ცოდვები არ გადადის შთამომავლობაზე, მაგრამ ნათესაური ქორწინების დროს, შთამომავლობა ხშირად მართლაც გამოდის არაჯანსაღი. მათში ხშირად ვლინდება ფიზიკური ნაკლი.
- მკითხველებს ხშირად აინტერესებთ, შეიძლება თუ არა მოგვარეზე ან დედის მოგვარეზე ქორწინება?
- მოგვარეზე, მით უფრო - დედის მოგვარეზე ქორწინებას ხელს არაფერი უშლის, თუ მათ შორის არ არსებობს ნათესაური კავშირი. გვაქვს ამის ისტორიული ფაქტები, - ბაგრატიონთა შორის ქორწინებები, ვთქვათ, თამარ მეფისა და დავით სოსლანის ქორწინება. მათ შორის შვიდთავიანი თაობა გასული იყო და ქორწინება სწორედ ამის გამო შედგა.
- როგორ უნდა წარიმართოს ჯვარდაწერილთა თანაცხოვრება? აქვს თუ არა მამაკაცს რაიმე უპირატესობა დედაკაცთან შედარებით? ეს საკითხი დღევანდელ ყოფაში საკმაოდ მწვავედ დგას.
- ჯვრისწერის დროს წასაკითხ სახარებაში, რომელიც მამაკაცის მიმართ იკითხება, წერია: გიყვარდეს ცოლი შენი, ვითარცა თავი შენი. როდესაც უფალმა ევა შექმნა ადამის ნეკნისგან, ადამმა შეხედა და თქვა: "ესე არს ხორცი ჩემი ხორცთაგანი და ძვალი ჩემი ძვალთაგანი". ჯვარდაწერილი წყვილი ხდება განუყოფელი. უფალმა ჯერ მამაკაცი შექმნა და შემდეგ - ქალი, მაგრამ ეს მამაკაცს არამც და არამც არ აძლევს უფლებას, რომ იბატონოს ქალზე. დედაკაციც ისეთივე თავისუფალი ნების მქონეა, როგორიც მამაკაცი. დედაკაცი ფიზიკურად უფრო სუსტი არსებაა, ვიდრე მამაკაცი და ამიტომაც უფალმა დედაკაცს მამაკაცი მიუჩინა მფარველად. სხვა უპირატესობა დედაკაცთან შედარებით მას არა აქვს. მამაკაცი არის ოჯახის თავი, მისი მოვალეობაა იზრუნოს ოჯახზე. დედაკაცი სიყვარულით უნდა მორჩილებდეს. მათ შორის ფუნქციები ლოგიკურად უნდა იყოს განაწილებული. ცხადია, მძიმე ფიზიკური სამუშაო მამაკაცმა უნდა შეასრულოს და მათი თანაცხოვრება უფლის სიყვარულს ეფუძნებოდეს.
- სამწუხაროდ, სხვადასხვა მიზეზით ხშირად ინგრევა ოჯახები. როგორ უნდა მოიქცეს ჯვარდაწერილი წყვილი, ჯვრისწერის გასაუქმებლად, გვირგვინის აყრისთვის?
- არავითარი წესი, კანონი და ლოცვა ჯვრისწერის დარღვევისა, არ არსებობს. ასევე არ არსებობს არავითარი მიზეზი, გარდა მრუშობისა, ოჯახის დასანგრევად, თუმცა ადამიანური უძლურებიდან გამომდინარე, ოჯახი ინგრევა და ჯვარდაწერილ წყვილს სურს, მეორედ იქორწინოს. ასეთ შემთხვევაში, ეკლესია იკვლევს მათი დაცილების მიზეზებს და თუ შეუძლებელია ოჯახის შენარჩუნება, მეორედ ქორწინების ნებას რთავს. ეს ნებართვა უნდა გასცეს მღვდელმთავარმა ან საპატრიარქომ. თუ რაიმე საშუალება არსებობს, რომ ოჯახი აღდგეს, ეკლესიამ ყველა ღონე უნდა გამოიყენოს საამისოდ. მეორედ და მით უფრო - მესამედ ქორწინება, ღვთისთვის სათნო არ არის.
- რამდენად დიდი ცოდვაა ქალისა და მამაკაცის ჯვარდაუწერლად თანაცხოვრება?
- ჯვრისწერის გარეშე, ნებისმიერი ურთიერთობა ქალსა და მამაკაცს შორის, მრუშობის ცოდვად ითვლება. ჯვრისწერით უფალი გვაძლევს კურთხევას, რომ ცოდვაში არ ვიყოთ.
შორენა მერკვილაძე
www. gza.ambebi.ge