გოგრის უნივერსალური სამკურნალო თვისებები და ნინო ვაჭარაძის უგემრიელესი რეცეპტი



გოგრის მრავალი სახეობა არსებობს და ყველა მათგანი ძალიან სასარგებლოა. მას ადამიანები უძველესი დროიდან იყენებ და დღემდე შეუძლია გაეჯიბროს სხვა ხილსა და ბოსტნეულს არამარტო გიგანტური ზომით, არამედ სარგებლიანობის თვალსაზრისითაც.

გოგრა შეიცავს ადამიანის ჯანმრთელობისათვის აუცილებელ მრავალ სასარგებლო და საკვებ ნივთიერებას. მიკროელემენტებისა და ვიტამინების მაღალი შემცველობის წყალობით გოგრას ურჩევენ გულ-სისხლძარღვთა ნებისმიერი დაავადების, შეშუპების, ანემიის მქონე ადამიანებს, ასევე სიმსუქნის დროს.

გოგრის ნარინჯისფერი ჯიში შეიცავს ბეტა კაროტინს მეტი რაოდენობით, ვიდრე სტაფილო და ის სამკურნალო თვისებების მატარებელია. ძალიან სასარგებლოა გოგრა რკინა-დეფიციტური ანემიის დროს, ვინაიდან შეიცავს სისხლწარმოქმნისათვის აუცილებელ მინერალურ ნივთიერებებს (რკინა, კობალტი, სპილენძი). იგი შეიცავს დიდი რაოდენობით თუთიის მარილებს, რაც ხელს უწყობს პოტენციის ამაღლებას. ინდოეთში გოგრას პატივს მიაგებენ მასში Е ვიტამინის მაღალი შემცველობის გამო, რადგანაც ითვლება, რომ ის ხელს უშლის სიბერეს. გოგრა ჩემპიონია ბოსტნეულს შორის რკინის, ფტორისა და სპილენძის შემცველობის მიხედვით. მისი ნაყოფი მდიდარია შაქრებით, პექტინით, В ჯგუფის ვიტამინებით, С და Е ვიტამინებით. გოგრის უჯრედისი კარგად გადამუშავდება და შეითვისება.

უმი გოგრა აუმჯობესებს ნაღვლის ბუშტის ფუნქციას, ამცირებს ნაწლავების ანთებას. გოგრის წვენს დასალევად ურჩევენ მაღალი მჟავიანობით მიმდინარე გასტრიტის დროს. გარდა ამისა, ის ითვლება ერთ-ერთ საუკეთესო შარდმდენ მცენარედ. აღმოჩნდა, რომ გოგრის ფაფა აქვეითებს ბრონქიტით გამოწვეულ მაღალ ტემპერატურას. გოგრის წვენი შეუცვლელი საშუალებაა ჩვეულებრივი გაცივების დროს: ის ამცირებს ტკივილსა და ყელში ფხაჭვნის შეგრძნებას, ზრდის იმუნიტეტს. გამოვლენილია მისი კიდევ ერთი სასარგებლო თვისება: ის ამაგრებს კბილის ემალს, ხელს უწყობს კარიესის პროფილაქტიკას.

თაფლით დამტკბარი გოგრის ნახარში არამარტო სასიამოვნო დასალევია, არამედ უნიკალური დამამშვიდებელი საშუალებაა მათთვის, ვისაც აწუხებს უძილობა. ერთი მესამედი ჩაის ჭიქა ასეთი სასმელი საკმარისია ტკბილი ძილის მოსაგვრელად. გოგრას შეუძლია კანის პრობლემების მოგვარებაც. მისი რბილობისაგან დამზადებული ფაფით შეიძლება ვუმკურნალოთ დამწვრობას და ანთებას. გოგრის ყვავილის ნახარშით ჩირქოვანი ჭრილობების დამუშავება აჩქარებს მათ შეხორცებას.

გოგრის თესლი კარგადაა ცნობილი, როგორც ჭიების წინააღმდეგ ბრძოლის გამოცდილი საშუალება. მას ასევე ურჩევენ ორსულებს ტოქსიკოზის დროს – გულისრევის შესამცირებლად.

მიუხედავად მრავალი სასარგებლო თვისებისა, არსებობს ზოგიერთი აკრძალვა გოგრის გამოყენების თვალსაზრისით. გოგრა არ არის სასარგებლო მათთვის, ვისაც აქვს შაქრიანი დიაბეტი, კუჭისა და 12-გოჯა ნაწლავის წყლულოვანი დაავადება, დაქვეითებული სეკრეციით მიმდინარე გასტრიტი.

გოგრა უნდა შევინახოთ სიგრილეში, სარდაფში ან შემინულ ლოჯიაში. ჰაერის ტემპერატურა არ უნდა აღემატებოდეს +15°С და არ უნდა იყოს +2 С°-ზე ნაკლები. ზამთრის გოგრას არ უყვარს მზის პირდაპირი სხივები, ამიტომაც მას უნდა გადავაფაროთ რაიმე ქსოვილი. თუკი გოგრა ბევრი გაქვთ, ეცადეთ შენახვისას ისინი არ ეხებოდნენ ერთმანეთს.

გოგრის რბილობი გამოიყენება წვნიანის, ღვეზელების, პურისა და დესერტების დასამზადებლად. გოგრის გამომშრალ ან შებრაწულ მარცვლებს იყენებენ, როგორც მზესუმზირას, ასევე სხვადასხვა სალათებში. რაც შეეხება გოგრის ყვავილებს, მისი გამოყენება ასევე შეიძლება საკვებად, კერძოდ სალათების დასამზადებლად. გოგრის საგემოვნო თვისებების გასაუმჯობესებლად იყენებენ სანელებლებს, ამატებენ სხვა ბოსტნეულს. მისი გემო და არომატი უკეთესია გოგრის აირღუმელში დამზადებისას, ვიდრე მოხარშვის ან ორთქლზე მომზადების შემთხვევაში. იდეალური გარნირია, თან სასარგებლო.

გოგრის უნივერსალური სამკურნალო თვისებები და ნინო ვაჭარაძის უგემრიელესი რეცეპტი


გოგრა ფარშით

თუ დღეს კატლეტს ამზადებთ , ან ვთქვათ, გუფთას, გადაინახეთ ერთი მუჭა უმი ფარში, დაყარეთ მოთუშულ ხახვთან ერთად ტაფაზე, დაასხით წყალი და მოხარშ-მოთუშეთ. ამ პროცესში დაუმატეთ 2 დაფნის ფოთოლი, რომელიც გემოთი გაამდიდრებს.

მოკლედ, ასე: ტაფაზე კარაქში წვრილად დაჭრილი ხახვი მოხრაკეთ, დაუმატეთ ფარში, დაასხით 200 ან მეტი გრამი წყალი, დაუმატეთ დაფნის ფოთოლი და ამ წყლის თუხთუხში ფარში ჯერ მოიხარშება, შემდეგ ხრაკვას დაიწყებს… ამოაცალეთ დაფნის ფოთლები. ხის კოვზით კარგად გაშალეთ ფარშის კოშკოშები და მარილი და შავი პილპილი გემოვნებით დაუმატეთ. შემდეგ ამავე ტაფაზე დაუმატეთ მოხარშული, გადაწურული ბრინჯი. მოურიეთ. გემო კვლავ ზუსტად დასვით. მარილი და პილპილი უნდა ემჩნეოდეს, გოგრასთან ერთად გერიელი გულსართის როლი რომ შეასრულოს…

გოგრა შუაზე გაჭერით, ამ ჯიშის გოგრა ადვილად იჭრება. გული კოვზით ამოასუფთავეთ. დიდ ქვაბში 1 ჭიქა წყალი ჩაასხით, ჩადეთ შიგ გოგრის ორივე ნაწილი და ცეცხლზე დადგით. წყლის ორთქლმა გოგრა უნდა დაარბილოს, თითქმის მოხარშოს. არ მიგეწვათ. წყალი უცებ ქრება. როგორც კი ამოქრება, ჩაამატეთ კიდევ ცოტა წყალი. გულსართი გემოვნებით შეკმაზეთ. მე დავუმატე მწიკი დაფქული მუსკატის კაკალი. შეგიძლიათ აჯიკაც შეურიოთ… ან სვანური მარილი… ითამაშეთ გემოთი.

ასევე ხახვთან ერთად დაფარშთან ერთად მე ფერადი ბულგარულებიც ჩავაჭერი… სხვა ბოსტნეულიც მოუხდება, მაგალითად სტაფილო, ან ბროკოლი.

ანუ: ცარიელ ქვაბში, წყალი მხოლოდ ფსკერს ფარავს, 2 თითზე . და გოგრა მხოლოდ ორთქლით იხარშება:))) როცა გოგრა შერბილდება, ამოიღეთ, ქაღალდის ხელსახოცით გაამშრალეთ, მოასხით ცოტა ზეთი. ზედ დაალაგეთ ფარშიანი გულსართი. მოახეხეთ ზედ ყველი. მე შებოლილი სულგუნი მოვახეხე. შედგით ცხელ ღუმელში და გადაბრაწეთ. უგემრიელესი გამოვიდა.

რულეტივით დაიჭრა გოგრიანად. ფანტასტიური გარნირიააა.

ნინო ვაჭარაძე

www.postalioni.com
































ტექსტის სანახავად გაიარეთ რეგისტრაცია.