ნიღბები და კრემები ნატურალური ინგრედიენტებით საოცრებებს ახდენს, მაგრამ თავისუფლად შეგვიძლია ბევრად მეტი გასაოცარი ეფექტი მივიღოთ, თუ ბიუთი-მიზნებისთვის თავად პროდუქტებს გამოვიყენებთ.
განსაკუთრებით მაშინ, როცა ისინი მარტივად ხელმისაწვდომია თითოეული ჩვენგანისთვის. ამჯერად გირჩევთ, ყურადღება მიაქციოთ… პომიდორს. უცნაურია, მაგრამ ამ ბოსტნეულს ყველაფრის თუ არა, ძალიან ბევრი რამის გაკეთება შეუძლია ჩვენი კანისთვის!
ამ ბოსტნეულში შემავალი ვიტამინები, მინერალები, ანტიოქსიდანტები – ყოველივე ეს დიდი მიზეზია იმისთვის, რომ ამის მერე სერიოზულად დაფიქრდეთ მანამ, სანამ სალათში გულუხვად ჩააჭრიდეთ პომიდორს ან დარბილებულს სანაგვეში მოისროდეთ.
ლიკოპინი და კაროტინოიდები, რომლებიც პომიდორს სისხლისფერ-წითელ ფერს ანიჭებს, თურმე, anti-age თვისების მქონე და ცნობილი ანტიოქსიდანტებია. ხოლო კანის აღმდგენ ფუნქციას უნდა ვუმადლოდეთ ბოსტნეულში შემავალ A ვიტამინს.
ვწმენდთ კანს
პომიდორი და ავოკადო დააბლენდერეთ და მიიღეთ უნივერსალური გამწმენდი ნიღაბი ნებისმიერი ტიპის კანისთვის, მაგრამ ჯერ კანის პატარა ნაწილზე მოსინჯეთ (როგორც ამას ახალი კრემის შემთხვევაში აკეთებთ), როგორ რეაგირებთ ამ პროდუქტებზე. თუ რეაქცია ნულია, თამამად დაიდეთ მთელ სახეზე და გაიჩერეთ 10-15 წუთის განმავლობაში. ამ დროის განმავლობაში ტომატი ღრმად გაწმენდს თქვენს კანს, ხოლო ავოკადო – დაამშვიდებს მას. სხვათა შორის, როცა ნიღაბს ჩამოიშორებთ, ნახავთ, რომ ფერიმჭამელებიც აღარ გაქვთ.
ვავიწროებთ ფორებს
ერთმანეთში აურიეთ ერთი სუფრის კოვზი ტომატის წვენი და ორი წვეთი ლიმონის წვენი. ბამბის ტამპონით წრიული მოძრაობით შეიზილეთ სახის კანში. გაიჩერეთ ათი წუთით, შემდეგ კი თბილი წყლით ჩამოიბანეთ. ესეც ასე: ფორები საგრძნობლად შევიწროვდა.
ვიშორებთ გამონაყარს
პომიდვრის მჟავიანობის დონე საკმაოდ მაღალია იმისათვის, რომ აკნეს ვებრძოლოთ. ბოსტნეულის თხელი ნაჭრები დაიდეთ გამონაყარზე და გაიჩერეთ ნახევარი საათის განმავლობაში. 2-კვირიანი მცდელობა და შედეგი, პირდაპირი გაგებით, სახეზე აისახება.
უთხარით "არა" ცხიმიან კანს
ამინომჟავები და A და C ვიტამინები, რომლებიც პომიდორში მრავლად არის, კანთან შეხებისთანავე იწყებს მოქმედებას. ამიტომაც ტომატისგან მომზადებული ექსპრეს-ნიღბები ნამდვილი ხსნა არის ცხიმიანი კანისთვის. პომიდვრის რბილობისგან მომზადებული თითქმის გამჭვირვალე თხელი ნიღაბი 15 წუთში მოგაშორებთ კანზე ცხიმიან სიბზინვარეს, მინიმუმ მთელი დღით. საოცრებაა!
მზის დამწვრობა
A ვიტამინით მდიდარი პომიდორი საუკეთესო საშუალებაა მზისგან დამწვრობის მოსარჩენად. თუ ამ დროს ხელთ არ აღმოგაჩნდათ დამწვრობის საწინააღმდეგო სპეციალური საშუალება, თამამად შეურიეთ დაჭყლეტილ პომიდორს იოგურტი და დაიდეთ დამწვარ ადგილებზე.
ჯანმრთელი მბზინვარება
ჯადოსნურ პომიდორს შეუძლია რამდენიმე წუთში გააცოცხლოს და ჯანმრთელი იერი შესძინოს მოშვებულ კანს. შეურიეთ ტომატის წვენი თაფლს, დაიდეთ 10-15 წუთით კანზე და თავად დარწმუნდით ამ ნიღბის საოცრებაში.
სახლის პირობებში მომზადებული თმის კონდიციონერი
გამომშრალ თმასა და დაზიანებულ თავის კანს სენიორ-პომიდვრები უშველიან. გადაივლეთ თმაზე ტომატის წვენი, არ დაგავიწყდეთ მისი თავის კანშიც კარგად შეზელა, გაიჩერეთ რამდენიმე წუთით და ჩამოიბანეთ თბილი წყლით. ეს Hand-made-კონდიციონერი თქვენს თმას ნაყიდ ნიღაბზე არანაკლებ დაარბილებს და ჯანმრთელ იერს შესძენს
წყარო: etanews.ge
პომიდორი სახის კანს დაბერებისა და გამონაყარისგან იცავს
⏱️ 1 წთ.
👁️ 2 180
100%