ვისაც ტკბილი არ უყვარს, მისი ნამდვილად უნდა გშურდეთ. ტკბილის მოყვარულთათვის ირგვლივ იმდენი მაცდუნებელია, ძნელია თავს პატარა სიამოვნებებზე უარი უთხრა. ზომიერებას თუ არ დაიცავთ, ჯანმრთელობასთან სერიოზული პრობლემები გარდაუვალია. კანფეტები კი ამად არ ღირს.
სიმსუქნე
პირველ რიგში, რა თქმა უნდა, თქვენი ფიგურა ზარალდება. რაციონს, რომელშიც ბევრი ტკბილი და ცომეულია, ჯანსაღს ვერ ვუწოდებთ. ყველა ზედმეტ ნახშირწყალს შემდეგ გვერდებსა და სხვა შეუსაბამო ადგილებში იხილავთ. ყველაზე შორსწასულ შემთხვევებში სიმსუქნე გარანტირებულია, რაც თქვენი ჯანმრთელობისთვის სერიოზული საფრთხეა.
დიაბეტი
სწორედ ეს დაავადებაა სიმსუქნის თანმხლები. ტკბილის დიდი რაოდენობით გამოყენებისას, შაქარი სისხლში რჩება – ორგანიზმი ჭარბ რესურსს ვერ იყენებს. ამგვარად ინსულინის მაღალი დონე მუდამ შენარჩუნებულია, რაც მეორე ტიპის დიაბეტისკენ პირდაპირი გზაა. ამასთან გლუკოზის მაღალი დონე მთელ გულ–სისხლძარღვთა სისტემაზე უარყოფითად მოქმედებს. განსაკუთრებით იტანჯება სისხლძარღვები, რომელთა დაზიანებულ კედლებში დაგროვებას იწყებს ქოლესტერინი (ათეროსკლეროზისა და ინფარქტის რისკფაქტორი).
არაჯანსაღი კბილები
ტკბილეული რომ კბილებისთვის მავნეა, ამას ბავშვობიდან გვასწავლიან. შაქარი კარგი საკვებია ბაქტერიებისთვის. რაც უფრო მეტ ტკბილს იღებთ, მიკროორგანიზმები მით უფრო სწრაფად მრავლდებიან, მით უფრო სწრაფად განილევა კბილის მინანქარი და კარიესი ჩნდება. კბილებისთვის განსაკუთრებით მავნეა ირისი, წელვადი კანფეტები და მწებვარე კარამელი – ნელა იხსნებიან და კბილებში დიდხანს რჩებიან. მაშასადამე, მინანქარზე საქაროზის მოქმედების დრო მნიშვნელოვნად იზრდება. თუ შოკოლადის მოყვარული ხართ, იცოდეთ, ნებისმიერი რძის ან თეთრი შოკოლადის ფილა სანახევროდ სუფთა შაქრისგან შედგება. თუ ამ სასუსნავზე ერთბაშად უარის თქმა გიჭირთ, ნამდვილ მწარე, შავ შოკოლადზე გადადით. კაკაოს მაღალი შემცველობა პირის ღრუში ბაქტერიების აქტივობას ნაწილობრივ აბრკოლებს.
ცუდი კანი
დიდი ხანია გარდამავლი ასაკიდან გამოხვედით, მაგრამ სახესა და ზურგზე გამონაყართან ბრძოლა მაინც გიწევთ? პირველი, რაც უნდა გააკეთოთ, თქვენს მენიუს გადახედეთ. ყოველდღიურად ჩაისთან ნამცხვრები, ყავასთან ტორტის ნაჭერი – ავადმყოფობის გამომწვევი ბაქტერიებისთვის (ნაწლავების მიკროფლორას არღვევენ) ნამდვილი "სამოთხეა". თუ ტკბილეულის სიუხვეს არაბალანსირებულ კვებას დაუმატებთ, შეიძლება თამამად ვთქვათ, რომ კანის მდგომარეობას საკუთარი ხელებით აფუჭებთ. გარდა ამისა, შაქრის მეტისმეტი მოხმარება კანის უჯრედების ნაადრევ დაბერებას, ნაოჭების გაჩენას იწვევს. ეს ეხება არამხოლოდ ჩვეულებრივ კანფეტებს, ასევე ტკბილეულს, ბადაგს და კონცენტრირებულ წვენებს კოლოფებში.
გონებრივი აქტივობის დაქვეითება
ტკბილეულის მოყვარულები მუდამ იმეორებენ, რომ ტკბილი ტვინისთვის სასარგებლოა. ეს მართალია – ტვინისთვის გლუკოზა აუცილებელია, მაგრამ არა სუფთა შაქარი და არა იმ რაოდენობით, რომელსაც ვიღებთ. გამოკვლევებით დადგინდა, რომ რაციონი, რომელშიც მაღაზიის ტკბილეული ჩანაცვლებულია ხილითა და ბოსტნეულით, ხოლო შაქარი ჩვეულებრივი სახით სრულიად გამორიცხულია, ტვინის მუშაობისთვის სასარგებლოა. ამიტომ არ ღირს დაძაბული ინტელექტუალური სამუშაოს წინ ტვინის "გამოკვება" შოკოლადის ბატონით, თუნდაც მასში ბევრი თხილი იყოს.
დამოკიდებულება
შეიძლება უცნაურად ჟღერდეს, მაგრამ შაქარი ადამიანისთვის ნარკოტიკად იქცა. ალბათ განსაკუთრებულს ვერაფერს ხედავთ იმაში, რომ ყოველდღიურად შოკოლადის ნატეხს მიირთმევთ – ის ხომ ცოტაა, მაშასადამე, ზიანს არ მოიტანს. მაგრამ თანდათან უკვე ვერ წარმოგიდგენიათ, სადილი ტკბილით არ დაამთავროთ. ცუდი განწყობა, დაღლა ან გაღიზიანება ასევე აღიქმება, როგორც საბაბი, რათა თავი გემრიელი ნამცხვრით გაახალისოთ. ადრე თუ გვიან ტკბილზე დამოკიდებულება ჩნდება და ეს ჩვევა არაფრითაა თამბაქოს მოწევაზე უკეთესი, ისიც თქვენს ჯანმრთელობას ძირს უთხრის.
თუ გსურთ, ტკბილზე დამოკიდებულებისგან განიკურნოთ, თავშეკავება მოგიწევთ. 3–4 დღის შემდეგ ტკბილის მიმართ ლტოლვა გაქრება. უარყოფით ემოციებს სხვაგვარად ებრძოლეთ: ყურადღება საყვარელ მუსიკაზე ან საინტერესო ფილმზე გადაიტანეთ – დამოკიდებულება თანდათან თავისით დაინგრევა.
რით შეცვალოთ?
რამე გემრიელით პირის ჩატკბარუნებაზე სრულად უარის თქმა არ ღირს, მაგრამ შაქრის გამოყენების შემცირება და მავნე ტკბილეულის შეცვლა სასარგებლოთი აუცილებელია.
გადაეჩვიეთ შაქრიან ჩაის, დაივიწყეთ ტკბილი გაზიანი სასმელები ან პაკეტის წვენები. მინერალური წყალი უფრო სასარგებლოა და წყურვილსაც უკეთესად კლავს.
უარი თქვით თეთრ შაქარზე, სწორედ მას უწოდებენ "თეთრ სიკვდილს". კარგი შემცვლელია ლერწმის ყავისფერი შაქარი: ნაკლებად მავნეა და ორიგინალური გემო აქვს.
ნატურალური თაფლი სამკურნალო თვისებებს ფლობს. მასში უხვადაა ამინომჟავები, მინერალური მარილები და სხვა ძვირფასი მიკროელემენტები. შაქარი–რაფინადი სწორედ თაფლით ჩაანაცვლეთ.
ზოგჯერ შეგიძლიათ თავს უფლება მისცეთ, ცოტა "მაღაზიის" დესერტი მიირთვათ. ყველაზე უვნებელია: ზეფირი, მარმელადი, ხილის თათარა. ეს ტკბილეული შეიცავს პექტინს, რომელიც ნაწლავებზე სასიკეთოდ მოქმედებს. გარდა ამისა, მათში ნაკლები ცხიმი და შაქარია, ვიდრე კრემიან ტორტებსა და ნამცხვრებში.
რაც შეეხება შაქრის შემცვლელებს, მათი გამოყენება რეკომენდებული არ არის. მრავალი გამოკვლევით დამტკიცდა, რომ ქსილიტი, ასპარტამი, საქარინი და შაქრის სხვა ანალოგები ჯანმრთელობას სერიოზულ ზიანს აყენებს. "გვერდითი ეფექტების" სიაშია ალერგია, ნაწლავების მოშლა და ავთვისებიანი სიმსივნეები.
ჭამეთ ჩირი და თხილეული. შესაძლებლობის მიხედვით, არჩევანი შეაჩერეთ გარგარის ჩირზე ან ფინიკზე – უჯრედისებს, მაგნიუმსა და რკინას შეიცავს, მაგრამ ზომიერება დაიცავით: სარგებლობის მიუხედავად, ისინი საკმაოდ კალორიულია.
რა თქმა უნდა, არ დაივიწყოთ ქორფა ხილი და კენკრა – თვითონაც იცით, ჯანსაღი კვებისთვის რამდენად მნიშვნელოვანია
ტკბილეული – პრობლემების თაიგულის მიზეზი
⏱️ 1 წთ.
👁️ 3 158
100%