-„ჩემი ბიოგრაფიების ნაწილი არაზუსტ ფაქტებს შეიცავს. ვფიქრობ, არ იქნება ურიგო, ამას ერთხელ და სამუდამოდ წერტილი დავუსვა და საზოგადოებას ჩემს შესახებ თვითონვე მოვუთხრო“, -აღნიშნა მსახიობმა.
400 გვერდიან გამოცემაში 64 გვერდი ძველ და იშვიათ ფოტოებს უჭირავს. მსახიობი მკითხველს საკუთარი ცხოვრების კულისებში ახედებს. ის მძიმე ბავშვობაზე, უმამოდ გატარებულ წლებსა და საკუთარ განცდებზე ძალიან გულწრფელად საუბრობს. ამბობს, რომ მამა მის ცხოვრებაში ხელახლა მხოლოდ მაშინ გამოჩნდა, როდესაც დებმა, სოფიმ და მარიამ საკუთარი თავის რჩენა თვითონვე დაიწყეს.
იმ თავში, სადაც სოფი ლორენი ჯერ კიდევ სოფია შიკოლონედ არის მოხსენიებული, მსახიობი პირველ პროფესიულ ნაბიჯებს იხსენებს. მაშინ მონაწილეობა ე.წ. „მასოვკაში“ მიიღო.
-„როდესაც უცებ პირველ პლანზე მოვხვდი, წარმოვიდგინე, რომ კამერა ჩემზეც იყო მომართული. სინამდვილეში მე ფოკუსს გარეთ ვიყავი. მაშინ ამ უდიდესი კინონამუშევრის უმნიშვნელო დეტალს წარმოვადგენდი მხოლოდ. არაერთხელ მიგრძვნია თავი ძალიან პატარა ნამცეცად, მაგრამ შინაგანად ვგრძნობდი, რომ საკუთარ ადგილზე ვიყავი. ცოტა მოთმინება და ყველაფერი აუცილებლად გამოვიდოდა, - წერს ლორენი.
მსახიობმა წიგნში მომავალ ქმართან, პროდიუსერ კარლო პონტისთან შეხვედრაც დეტალურად აღწერა. ლორენმა მასთან 50 წელი გაატარა. მნიშვნელოვანი იყო მის ცხოვრებაში რეჟისორ ვიტორიო დე სიკას შემოსვლაც. სოფი ლორენის, პონტის და დე სიკას იღბლიანი შემოქმედებითი ტანდემის წყალობით ეკრანზე ისეთი ფილმები გამოჩნდა, როგორიცაა ქორწინება იტალიურად, მზესუმზირები და, რა თქმა უნდა, ჩოჩარა, რომელშიც მან ჟან-პოლ ბელმონდოსთან ერთად ითამაშა და ამ ფილმში შესრულებული როლისთვის 1962 წელს პირველი ოსკარი აიღო. აღსანიშნავია, რომ მისთვის ოსკარის გადაცემის შესახებ სოფი ლორენმა სახლში ყოფნისას შეიტყო.
-„მე არ წავსულვარ ლოს-ანჯელესში, იმიტომ, რომ ზუსტად ვიცოდი, გული წამივიდოდა, რომ წავაგებდი, თუმცა ასევე გული წამივიდოდა, თუ გავიმარჯვებდი. უძლიერესი ემოციები მავსებდა, ამიტომ იმ საღამოს სახლში დარჩენა გადავწყვიტე. ცოტა რომ დავმშვიდებულიყავი, გადავწყვიტე, საწებელი მომემზადებინა, - იხსენებს მისთვის ყველაზე მნიშვნელოვან დღეს მსახიობი, რომელიც, სხვათა შორის, კულინარული ნიჭითაც არის სახელგანთქმული.
მსახიობის აღიარებით, სოფია შიკოლონემ მსოფლიო დონის ვარსკვლავობას მისი ქმრის, კარლო პონტის წყალობით მიაღწია, რომელმაც არა მარტო იმ ფილმების სპონსორობა ითავა, რომელშიც ლორენი მონაწილეობდა, არამედ მსახიობისგან მსოფლიო მასშტაბის ვარსკვლავი შექმნა. მან საფუძველშივე შეცვალა მისი იმიჯი, მოუგონა ახალი „მყვირალა“ ფსევდონიმი და პირდაპირი მნიშვნელობით, აიძულა, ესწავლა ინგლისური იმისთვის, რომ ამ უკანასკნელს საკუთარი თავის შესახებ ჰოლივუდში განეცხადებინა.
წიგნში ცალკეული თავები ეძღვნება ოდრი ჰეპბერნთან მეგობრობას, ასევე მის რომანს ცნობილ მსახიობთან, 60-იანი წლების ვარსკვლავთან, კერი გრანტთან, რომელიც პირდაპირ გადასაღებ მოედანზე დაიწყო. როგორც გაირკვა, სწორედ ეს რომანი და ეჭვიანობა დაეხმარა მაშინ ჯერ კიდევ დაოჯახებულ პონტს, გაშორებოდა ცოლს და დაქორწინება თავისი „გალათეასთვის“, სოფი ლორენისთვის შეეთავაზებინა.
წიგნში ლორენი მის ახლო მეგობართან და საყვარელ პარტნიორთან, მარჩელო მასტროიანისთან და მომღერალ ფრენ სინატრასთან ურთიერთობებზეც საუბრობს. მკითხველს დიდი ხნის ნანატრი დედობის სიხარულსაც უზიარებს. ახლა მსახიობი ორი წარმატებული ვაჟიშვილის, ედუარდოსა და კარლოს დედაა, თუმცა იყო დრო, როდესაც პოპულარობის პიკზე მყოფი ერთადერთ რამეზე - შვილის გაჩენაზე ოცნებობდა. იმისთვის, რომ ოცნება რეალობად ექცია, უშვილობის თერაპიის გრძელი კურსის გავლა მოუხდა და მრავალი თვე წოლით რეჟიმში გაატარა.
ახლახან მსახიობმა 80 წლის იუბილე აღნიშნა. ხუთი ოქროს გლობუსის და ორი ოსკარის მფლობელის დაბადების დღე მთელმა იტალიამ დიდი ენთუზიაზმით აღნიშნა. მილანში მაღალი მოდის კვირეული ფარგლებში ფოტოექსპოზიცია გაიხსნა, რომელიც მსახიობის ცხოვრებასა და მოღვაწეობას მიეძღვნა. ხოლო ნეაპოლში ლორენის საპატივცემულოდ პიცა „სოფი“ შეიქმნა, რომელიც ცოტა ხანში პოპულარობით, შეიძლება, სახელგანთქმულ „მარგარიტასაც“ გაეჯიბროს. თავად იუბილარმა ამ დღის აღნიშვნა ვიწრო, ყველაზე ახლობელ ადამიანთა წრეში არჩია. საბოლოოდ კი წყნარი ოჯახური გრემო მსოფლიო ვარსკვლავების ინიციატივით და ორგანიზებით, დიდ ბანკეტში გადაიზარდა.
წიგნის გამოცემაც სოფი ლორენმა ამ მრგვალ თარიღს დაუკავშირა. რადგან მსახიობს კარიერა ჯერ არ დაუსრულებია, კინოკრიტიკოსების აზრით, მემუარები მისი ცხოვრების შეჯამებად ვერ განიხილება.
ამ ეტაპზე ჯერ კიდევ იდეალურ ფორმაში მყოფი მსახიობი აქტიურ ცხოვრებას აგრძელებს - ის ძველებურად მრავალი ტელეგადაცემის და საერთაშორისო კონოფესტივალის სტუმარია. ამ დრომდე გრძელდება მისი კინოკარიერაც. ბოლო ფილმი „ადამიანური ხმა“ მისი მონაწილეობით მისმა შვილმა ედუარდო პონტიმ ჯანა კოკტოს პიესის მიხედვით გადაიღო. მასში ლორენმა, 10 წლიანი შესვენების შემდეგ, მთავარი როლი შეასრულა. ფილმი კინოეკრანებზე 2014 წელს გამოჩნდა.
წყარო: www.sazogadoeba.ge