როგორც იცით, კარაქს რძის ნაღების თქვეფის შედეგად იღებენ. ამ პროდუქტში კი შედის 20 შეუცვლელი მჟავა, 50-85% რძის ცხიმი, ვიტამინები K,E, A, D.
ამიტომაც არის, რომ ის, ვინც დღეში 50 გრ კარაქს მიირთმევს, აქვს კარგი მხედველობა, სქელი თმა, კარგი კბილები, მყარი ძვლები. ასევე სასარგებლოა კარაქი კანისთვის.
მისგან მზადდება არაჩვეულებრივი ნიღბები კანის გასაახალგაზრდავებლად. აქრობს წვრილ ნაოჭებს და კანს გლუვს ხდის.
1. კომბინირებული, ნორმალური და მშრალი კანისთვის: ათქვიფეთ ერთი კვერცხის გული, 1 სუფრის კოვზ დარბილებულ კარაქთან ერთად. დაიდეთ ნიღაბი 20 წუთი, შემდეგ მოიშორეთ ხელსახოცით და ჩამოიბანეთ თბილი წყლით.
2. ნიღაბი კანის ხასხასა ფერისა და სიბზინვარისთვის: აიღეთ 1 სუფრის კოვზი გვირილა, დაასხით 100 მლ ადუღებული წყალი და გააჩერეთ რამდენიმე საათით. შემდეგ გადაწურეთ და 1 სუფრის კოვზ მიღებულ ნაყენში გახსენით 1 სუფრის კოვზი კარაქი. დაიდეთ სახეზე და გაიჩერეთ 20 წუთით. ნიღაბი ჩამოიშორეთ ჯერ ხელსახოცით, შემდეგ ჩამოიბანეთ გვირილის დარჩენილი ნაყენით. 30 წუთში დაიბანეთ სახე გრილი წყლით.
3. გამაახალგაზრდავებელი ნიღაბი: მოხარშეთ 1 ცალი კარტოფილი კანიანად, გაფცქვენით და დაჭყლიტეთ. დაუმატეთ 1 სუფრის კოვზი კარაქი და ცოტაოდენი შემთბარი ნაღები. დაიდეთ მიღებული ნიღაბი სახეზე და გაიჩერეთ 30 წუთი. შემდეგ ჩამოიბანეთ ჯერ თბილი წყლით, შემდეგ გრილით.
4. მკვებავი ნიღაბი: დაასხით ცხელი ნაღები 2 სუფრის კოვზ შვრიას, დაახურეთ თავსახური და აცალეთ გაფუება. მიღებული მასა გააგრილეთ და დაუმატეთ 1 ჩაის კოვზი თაფლი და 1 სუფრის კოვზი კარაქი. დაიდეთ ნიღაბი სახეზე და 20 წუთის შემდეგ ჩამოიბანეთ თბილი წყლით.
5. მათეთრებელი ნიღაბი: 1 ჩაის კოვზ ლიმონის წვენს შეურიეთ 1 სუფრის კოვზი კარაქი. 10 წუთით დაიდეთ სახეზე და ჩამოიბანეთ თბილი წყლით.
6. დამატენიანებელი ნიღაბი: 1 სუფრის კოვზ გახეხილ კიტრს შეურიეთ 1 სუფრის კოვზი ხაჭო და 1 სუფრის კოვზი კარაქი. ნიღაბი დაიდეთ 25 წუთით სახეზე, შემდეგ ჩამოიწმინდეთ თბილ წყალში დასველებული ბამბის ტამპონით.
7. ვიტამინიზირებული ნიღაბი: 1/3 ბანანის პიურეში დაუმატეთ 1 სუფრის კოვზი თაფლი და 1 სუფრის კოვზი კარაქი. დაიდეთ მიღებული მასა სახეზე და გაიჩერეთ 20 წუთი. ჩამოიწმინდეთ მწვანე ჩაის (წინასწარ მოამზადეთ, რომ გაგრილდეს) ნაყენში დასველებული ბამბის ტამპონით. 5 წუთში დაიბანეთ თბილი წყლით.
წყარო: presa.ge
კარაქზე დამზადებული სახის ჯადოსნური ნიღბები
⏱️ 1 წთ.
👁️ 9 481
100%