მერილინ მონროს დიეტა - "ვირჩევ სტეიკს, ცხვრის ხორცს ან ღვიძლს, რომელსაც ღუმელში ვწვავ. გარნირად კი სტაფილო"



სუპერვარსკვლავი მერილინ მონრო ბევრ რამეში ჩვეულებრივ გოგონად რჩებოდა.

ამას მოწმობს, მაგალითად, მსახიობის დიეტა, რომლის შესახებაც თავადვე ისაუბრა ერთ-ერთ ბოლო ინტერვიუში. მისი კვების რაციონის შესწავლის შემდეგ თანამედროვე დიეტოლოგები აღტაცებული დარჩნენ: უფრო გონივრული რეცეპტის მოფიქრება არც კი შეიძლებოდა.

მერილინი თაყვანისმცემლებს აღაფრთოვანებდა სავსე თეძოებითა და მკერდით. ამავე დროს მსახიობს ყოველთვის ვიწრო წელი ჰქონდა. სხვადასხვა დროს მისი წონა მერყეობდა, მაგრამ საშუალოდ თანამედროვე 42 ზომის სამოსს ატარებდა. მერილინი არასდროს იცავდა დიეტას – მის დროს ეს უბრალოდ არ იყო მიღებული, რადგან მამაკაცები ქალურ სიმრგვალეებს აფასებდნენ და სიგამხდრე არ გახლდათ მოსაწონი და აქტუალური. მით უმეტეს, ომგამოვლილ მერილინს, ისევე როგორც მისი თაობის სხვა გოგონებს, ნამდვილი შიმშილობა გამოცდილი ჰქონდათ და ძალით თავის მოშიების წინააღმდეგი იყვნენ. "არასდროს მიმაჩნდა ჩემი სხეული განსაკუთრებულად. ყველაზე მეტად ის მაღელვებდა, რომ ყოველთვის დანაყრებული ვყოფილიყავი", – ამბობდა ჰოლივუდის ლეგენდა.

მოხდენილობის შენარჩუნებაში მსახიობს ეხმარებოდა კვების სწორი რაციონი, რომელიც თავადვე შეიმუშავა. "სანამ შხაპს მივიღებ, ქურაზე ვდგამ ერთ ჭიქა რძეს. როცა გაცხელდება, ორ კვერცხს ჩავახლი შიგ, ჩანგლით ავურევ და ვსვამ. საუზმეს მულტივიტამინებით ვამთავრებ. არა მგონია, ექიმს უფრო ნოყიერი საუზმე გამოეწერა ჩემისთანა საქმიანი გოგონასთვის, რომელსაც სულ ეჩქარება."

მერილინი ვახშამსაც გემრიელად მიირთმევდა.

"შინ ჩემი ვახშამი საოცრად მარტივია – საღამო რომ მოახლოვდება, ბაზარში შევდივარ და ვირჩევ სტეიკს, ცხვრის ხორცს ან ღვიძლს, რომელსაც ღუმელში ვწვავ. გარნირად – ოთხი ან ხუთი ცალი სტაფილო. შინაგანად ნამდვილი კურდღელი ვარ – უმი სტაფილო არასდროს მწყინდება."

წყარო: primetimenews.ge
































ტექსტის სანახავად გაიარეთ რეგისტრაცია.